Ngế pro xiâm hnê ngăn tơnêi têa phiu ro tơdroăng châ tơƀrê Hneăng hôp pêi pro môi tuăn pơkâ pêi tơrŭm cheăng Việt Nam – Lếo hơnăm 2024 ƀă séa ngăn mơdêk Tơkêa tơrŭm cheăng pơla Việt Nam – Lếo hneăng hơnăm 2021 – 2025; mơnhên hnoăng cheăng dêi Vi ƀan tơrŭm cheăng péa tơnêi têa hiăng mơ-eăm, tơrŭm ƀă mâu kơ koan cheăng péa pâ tung 6 khế apoăng hơnăm 2024 tah lôi hên pá puât, tơvâ tơvân a mâu tơdroăng tơkêa bro tơrŭm cheăng ki xiâm, mơdêk tơrŭm cheăng tung hên kơvâ cheăng.

Ngế pro xiâm hnê ngăn tơnêi têa pơkâ thế Chin phuh Lếo kal rak tơniăn tíu mơ’no liăn cheăng tê mơdró, teăm tơleăng  tơdrêng mâu tơdroăng ki kreăng dêi khu tê mơdró Việt nam mơ’no liăn cheăng a Lếo; pơhlêh pro hlá mơ-éa, tŏng gum, pro tơ’lêi hlâu tung tơdroăng pêi pro mâu tơdroăng tơkêa bro dế pêi pro ƀă po rơdâ mâu tơdroăng tơkêa bro nếo, tơkŭm tung mâu kơvâ on tơhrik, têa châu, têa kơxăng, chiâ xo tơmeăm tung kơdâm tơnêi, uâ pro tơmeăm khoăng tung kơdâm tơnêi, pêi chiâk deăng, ôm hyô, hnê hriâm ƀă hía hé.