Tung roh lăm pôu pêi cheăng a kong têa Singapore, hâi lơ 9/2, pôa Phạm Minh Chính, Ngế pro xiâm hnê Chin phuh hiăng tơdah pôa Tiêu Chí Hiền,  Ngế xiâm râ xiâm hlối pro Ngế xiâm pơkuâ tơdroăng gâk kring kong têa Singapore. A roh tơdah, pôa Phạm Minh Chính, Ngế pro xiâm hnê ngăn tơnêi têa pơkâ thế pôa Tiêu Chí Hiền pơtối môi tuăn ƀă thăm mơnhông tơrŭm chiâng tơrŭm cheăng ton xŏn Việt Nam – Singapore tung tâi tâng mâu kơvâ cheăng, pakĭng kơvâ ki kal cho mơdêk tơdroăng loi tơngah ing tơpui tơno khu râ kăn ƀă trâm mâ khu râ kăn xiâm ƀă mâu râ.

Tơpui tơno ‘na tơdroăng kơpong ƀă lâp plâi tơnêi rơtế tơmâng, péa pâ môi tuăn tung pơla pá puât kố, péa tơnêi têa kal tơrŭm rak hơniâp lĕm, tơniăn ƀă tơrŭm a kơpong, tơleăng tơxup tơbriât ƀă troăng hơniâp lĕm tiô luât lâp plâi tơnêi; thăm tơrŭm môi tuăn, kum mơjiâng môi ASEAN rơdêi xêh, mơnhông mơdêk kro mơdrŏng ƀă mơdêk hnoăng tíu xiâm, ki má lối cho tung mâu tơdroăng kơpong.