A rôh tơdah, pôa Phạm Minh Chính - Ngế pro xiâm hnê ngăn tơnêi têa tối nhên, Việt Nam vâ rơtế ƀă Sinuâ tơbleăng pêi tơƀrê tơdroăng hlê tơdjuôm ki kân tiô troăng “6 luâ tâ’’ hiăng châ pôa Nguyễn Phú Trọng - Kăn xiâm pơkuâ hnê ngăn Đảng ƀă Kăn xiâm pơkuâ hnê ngăn Đảng, Kăn xiâm hnê ngăn tơnêi têa Tập Cận Bình tối nhên ƀă mâu tơdroăng ki kal cho mơdêk mâu rôh lăm pôu trâm mâ tơrá kăn xiâm ƀă rêm râ; mơdêk tơrŭm cheăng pơla mâu khu xiâm, kơvâ cheăng, kong pơlê péa tơnêi têa tung mê cho pêi tro mâu tơrŭm cheăng pơla Măt trâ̆n Tơnêi têa Việt Nam ƀă Khu kăn pơkuâ po hôp kân dêi Sinuâ.

Tơkŭm pêi klêi tâ nếo mâu tơdroăng cheăng trâm mâ tơpui ƀă kuăn pơlê; mơdêk tối ăm dêi rơpó ‘nâi mâu tơdroăng cheăng ‘na tơpui kâ, mơjiâng Đảng ƀă rak ngăn tơnêi têa; pro trâu tâ tơrŭm cheăng tung kơvâ cheăng, malối cho cheăng kâ-tê mơdró, ‘no liăn cheăng ƀă tơdjêp pro troăng kân.