Hneăng hôp tơpui tơno xua Khu xiâm pơkâ túa cheăng ƀă mơ’no liăn cheăng, Kăn teăng mâ kong têa Nhuk ƀă Khu tơrŭm cheăng kâ Nhuk rơtế tơkŭm po ƀă châ mơ’no tơdrêng tung um tiô troăng hyôh măng troh rơpâu khu tê mơdró tung lâp tơnêi têa Nhuk. Xông tơpui a hneăng hôp tơpui tơno, pôa Phạm Minh Chính hiăng tối mâu tơdroăng ki má môi ki tơrŭm cheăng pơla Việt Nam – Nhuk, Ngế pro xiâm hnê ngăn tơnêi têa tối nhên, Nhuk hiăng châ mâu tơdroăng ki tơƀrê kân ƀă hnoăng cheăng kâ mơnhông mơdêk râ a ‘ngêi, pơkuâ kŏng ngê̆ ki rơkê má môi lâp plâi tơnêi ƀă cho môi tung mâu kong têa ối má môi ‘na xúa khoa hok kŏng ngê̆ ƀă mơnhông mơdêk cheăng kâ xúa kŏng nghê̆, rêh ối pơlê pơla xúa kŏng ngê̆.

Hneăng hôp tơpui tơno cho tơdroăng ki kal vâ péa pâ mơnhên roh tơ’lêi, tơdroăng mơhúa lơ ôh xuân môi tiah mâu tơdroăng pá puât, pơloăng mơnúa nếo; tối ăm dêi pó mâu túa ki rơkê tơtro vâ ing mê pơkâ mâu troăng prôk, hnoăng cheăng tung la ngiâ; kum pin châ pơkâ pêi, pói tơngah mơnhông mơdêk krá tơniăn a rêm kong têa, ƀă kum thăm mơnhông tơrŭm cheăng ton xŏn loi tơngah, achê dêi pó pơla Việt Nam ƀă Nhuk.

Ngế pro xiâm hnê ngăn tơnêi têa pơkâ thế mâu Khu xiâm, kơvâ cheăng, mâu ngế cheăng khoa hok, mâu khu tơrŭm cheăng, khu tê mơdró dêi kong têa Nhuk ƀă Việt Nam rơtế tơpui tơno, tối dêi pó mâu túa ki rơkê tơtro vâ tơbleăng kum Chin phuh mâu troăng pêi ki pơxúa vâ tơmiêt troh tơdroăng krá tơniăn ƀă mơnhông mơdêk rơdêi dêi péa pâ.