A pơlê kong xiâm Bruxelles, kong têa Bih, pôa Phạm Minh Chính, Ngế pro xiâm hnê ngăn tơnêi têa hiăng veăng leh ƀă tối tơbleăng a hneăng hôp mâu kăn xiâm tơpui ‘na tê mơdró dêi ASEAN - EU ƀă tơdroăng pơxá: Mơdêk Tê mơdró pơla ASEAN - EU: Tơbleăng krá tơniăn ăm tâi tâng rêm ngế’’. Tối tơbleăng a hneăng hôp, pôa Phạm Minh Chính, Ngế pro xiâm hnê ngăn tơnêi têa tơbleăng 5 tơdroăng ki kal tung mê, tối nhên thế mơdêk tơrŭm môi tuăn ƀă lâp plâi tơnêi,  mơdêk chuh nghiah hên troăng, tơrŭm krá, pơxúa tơƀrê  tâ pơla mâu kong têa.

Ngế pro xiâm hnê ngăn tơnêi têa tối nhên, tơdroăng tơrŭm tê mơdró pơla EU ƀă ASEAN rế ton rế mơnhông tung tŭm tơdroăng ‘na ki kân, ki tơƀrê tung pêi pro mâu kong têa thế pêi klêi tơniăn tâ nếo mâu tơdroăng mê tro tiô luât, pro xiâm, tơdroăng tơ’lêi hlâu má môi vâ mâu khu mơdró pơtối rak vế ivá pêi cheăng, ki hriăn plĕng, hnoăng cheăng pêi, tơdjêp rơdêi tâ, pơtối rak vế ki tơƀrê hiăng châ pêi pro.

Ngế pro xiâm hnê ngăn tơnêi têa tối, Việt Nam pêi tro tiô troăng rơhlâ tơpui kâ krê, pơkuâ xiâm dêi hên troăng, hên túa tơrŭm tơpui kâ, xua vâ pro hơniâp lĕm, tơrŭm tơrôa, tơrŭm cheăng ƀă mơnhông mơdêk.