Tung roh lăm pôu kong têa Singapore, kơxo lơ 10/2, pôa Phạm Minh Chính, Ngế pro xiâm hnê ngăn Chin phuh hiăng veăng hôp ƀă Khu mơdró Việt Nam - Singapore. Veăng hôp mê ai kăn mâu kăn dêi Khu xiâm, kơ koan cheăng tung Chin phuh, mâu khu tơrŭm cheăng ƀă hên mâu khu mơdró péa tơnêi têa. A hneăng hôp, mâu kăn tối nhên tơdroăng tơrŭm pơla Việt Nam - Singapore mơnhông mơdêk rơkê plĕng, rơdêi tung mâu tơdroăng cheăng. Hơnăm 2023 kố, péa tơnêi têa tơbâ 50 hơnăm mơjiâng tơpui kâ ƀă 10 hơnăm mơjiâng Tơrŭm cheăng.

Tơbleăng a hneăng hôp, pôa Phạm Minh Chính, Ngế pro xiâm hnê ngăn Chin phuh ăm ‘nâi, hơnăm 2023, Việt Nam ƀă Singapore tơbâ 50 hơnăm mơjiâng tơpui kâ, 10 hơnăm mơjiâng tơrŭm cheăng pơla Việt Nam - Singapore, 100 hơnăm hâi kot mâ pôa Lý Quang Diệu, Ngế pro xiâm hnê ngăn tơnêi têa hneăng hdrối nah. Luâ 50 hơnăm tơrŭm cheăng ƀă dêi rơpó, péa tơnêi têa Việt Nam – Singapore hlê plĕng dêi rơpó tâ, loi nhoăm dêi rơpó tâ; tung tŭm tơdroăng, pêi cheăng khât hlối tơƀrê tâ; cho xiâm pêi ki kal vâ mơdêk tơrŭm cheăng, troh tơdroăng mơjiâng mâu rôh ki hdró tơdroăng kal tung tơrŭm cheăng péa tơnêi têa; veăng ‘no hnoăng pro hơniâp, tơniăn, tơrŭm, mơnhông tơ ƀrê tung kơpong ƀă lâp plâi tơnêi.