Ki xiâm dêi hneăng hôp rôh kố cho tơpui ‘na tơdroăng trâm pơloăng mơnúa, tơdroăng xơpá ƀă tơdroăng ki hngăm ngo ai pơkâ ăm vâi kơdrâi drêng xo pêi mâu tơdroăng cheăng rak ngăn la ôh tá kâ liăn khế  ƀă tơdrêng amê cho tơdjâk hên tơdroăng ƀă hnoăng cheăng veăng ‘no dêi vâi kơdrâi môi tiah lơ pơrah pơla kơdrâi ƀă kơnốu, ôh tá châ vâ hriâm, pêi cheăng, tro tôu pâm ‘nêk mơ’nêa.

Tơbleăng a hneăng hôp, pôa Phạm Minh Chính tối nhên, mâu hnoăng veăng ‘no kân kĭn dêi vâi kơdrâi, hlối cho xiâm ki krá kâk vâ mơnhông ki tơƀrê tung rêh ối dêi tơrêm rơpŏng hngêi, hlối cho mâu ngế ki djâ troăng ahdrối tung mơnhông krá tơniăn dêi pơlê pơla. Ngế pro xiâm hnê ngăn tơnêi têa tối rôh mơgêi hneăng hôp pêi pro tiô mâu pơkâ tơnêi tea ‘na tơdroăng ôh tá pơrah pơla kơdrâi ƀă kơnốu hơnăm 2023 dêi Việt Nam.