Hâi lơ 19/8, pôa Phạm Minh Chính, Ngế pro xiâm hnê ngăn Chin phuh veăng Hôp tối mơgêi hơnăm hriâm 2023-2024 ƀă tơbleăng tơdroăng cheăng pêi hơnăm 2024-2025 xua Khu xiâm ngăn hnê hriâm ƀă hnê mơjiâng tuăn ngôa rơkê tơkŭm po tiô tơdroăng mơ’no tơdrêng pơla tíu mơ’no xiâm a Hà Nội ƀă 63 to kong pơlê, pơlê kong kân râ xiâm tơnêi têa.

Teăng mâ Chin phuh, pôa Phạm Minh Chính, Ngế pro xiâm hnê ngăn tơnêi têa tơmâng xo, khĕn kơdeăn ƀă hâk rơkâu mâu hnoăng hiăng pêi châ tơƀrê dêi kơvâ Hnê hriâm tung hơnăm hriâm kố nah, veăng ‘no hnoăng tơdjuôm dêi tơnêi têa tung mâu hơnăm hdrối. ‘Na mâu tơdroăng cheăng, troăng pêi ki kal Ngế pro xiâm hnê ngăn tơnêi têa pơkâ thế Khu xiâm ngăn hnê hriâm ƀă hnê mơjiâng tuăn ngôa rơkê, mâu khu xiâm, kơvâ cheăng, kong pơlê tiô hnoăng cheăng pêi, hnoăng pơkuâ ngăn tơkŭm tơbleăng pêi; teăm tối tơbleăng ăm râ kơpêng ƀă mâu tơdroăng ki tơxâng hnoăng tơná pơkuâ.

Malối hbrâ tŭm mâu tơdroăng vâ mot hơnăm hriâm nếo, tơkŭm pêi tro troh leh mot hơnăm hriâm nếo hâi lơ 5/9 la ngiâ, pro tíu ki xah hêi ro ăm hơnăm hriâm nếo, malối mơdêk tơƀrê mâu thái cô hnê rế tro tâ, ai tiô tơdroăng púi vâ.