Tơbleăng a rôh leh tơbâ, Ngế pro xiâm hnê ngăn tơnêi têa khĕn kơdeăn ƀă rơkâu mâu hnoăng hiăng pêi châ tơƀrê dêi kơvâ pro trếo pơkeăng ki hiăng chiâng pro tung tơdroăng mơjiâng ƀă mơnhông tơƀrê 55 hơnăm hdrối. Ngế pro xiâm hnê ngăn tơnêi têa tối nhên, tung tơdroăng pêi cheăng xúa kơmăi kơmok tiô túa nếo nôkố, kơvâ pro trếo pơkeăng cho kơvâ cheăng ƀă kơmăi kơmok xiâm, xua Grup pêi cheăng ‘na pro trếo pơkeăng Việt Nam dế trâm tơdroăng pơkâ thế pêi la ôh tá kâi mơnhông.

Kố cho hnoăng cheăng pôu râng ki hngăm a ngiâ Đảng, Tơnêi têa ƀă kuăn pơlê. Ngế pro xiâm hnê ngăn tơnêi têa pơkâ thế tung la ngiâ, Grup ngăn ‘na pro trếo pơkeăng Việt Nam thế tơrŭm krá môi tuăn ƀă dêi rơpó, tŭm tơdroăng thế pơkâ pêi vâ pro pơxúa ăm tơnêi têa, hdroâng mơngế ki má môi; hbrâ tơrrŭm krá, pêi cheăng pơxúa tơƀrê ƀă mâu khu xiâm, kơvâ cheăng, mâu kơ koan, tíu pêi cheăng, đông lêng, kong pơlê ƀă dêi rơpó; tơrŭm krá tung tơrá mâu kăn mâu ngế pêi cheăng tung kơ koan tíu pêi cheăng, mâu grup, khu xiâm ngăn kŏng ti, pơla mâu khu mơdró; hbrâ tơmâng ‘no liăn, xúa rôh ki vâ mơnhêng mơdêk ngiât lĕm, pơ’lêh kơxô̆ ngiât, mơnhông  pro on tơhrik  krúa krá ton.