Ƀai xông tơpui dêi Ngế pro xiâm hnê ngăn tơnêi têa ai pơxá inâi: Thăm tơrŭm ƀă Khu tơrŭm cheăng ton xŏn tâi tâng Việt Nam - Ấn Độ xua hơniâp lĕm, tơrŭm ƀă mơnhông a kơpong Ấn Độ Dương – Châu Á – Thái Bình Dương ƀă lâp plâi tơnêi’’.

Ngế pro xiâm hnê ngăn tơnêi têa tối 3 tơdroăng xiâm mê cho: Tơdroăng lâp plâi tơnêi ƀă kơpong; Troăng pơkâ pêi, troăng prôk, troăng hơlâ, tơdroăng châ tơƀrê ƀă mơnhên troăng prôk la ngiâ mơnhông dêi Việt Nam; Tơmiât pêi la ngiâ tơrŭm cheăng Khu tơrŭm cheăng ton xŏn tâi tâng Việt Nam - Ấn Độ tung la ngiâ.

Tiô Ngế pro xiâm hnê ngăn tơnêi têa ing mâu tơdroăng lâp plâi tơnêi a kố kal ai troăng tơmiât tâi tâng, tŭm têk, pơkâ thế tâi tâng mâu kong têa thế mơ-eăm tơpui tơno, tơrŭm cheăng tiô hiâm mơno tơrŭm, môi tuăn. Tung mê, tơdroăng tơrŭm môi tuăn, tơrŭm cheăng ƀă nhŏng o Việt Nam - Ấn Độ kal đi đo châ rak krá tơniăn ƀă mơnhông.

Kơmăng lơ 1/8, tơƀai pơto pôa Phạm Minh Chính - Ngế pro xiâm hnê ngăn tơnêi têa lo ing pơlê kong xiâm New Delhi mơgêi lĕm tro roh lăm pôu râ Tơnêi têa troh a Ấn Độ.