Kơxo hâi lơ 10/3/2023 a Hà Nội, Khu xiâm Kŏng an tơkŭm po hôp mơ’no tơdrêng tung lâp tơnêi têa ‘na hbrâ, mơdât ma tŭi. pôa Phạm Minh Chính, Ngế pro xiâm hnê ngăn Chin phuh veăng hôp ƀă tơbleăng hnê tối a rôh hôp.  Tơbleăng a rôh hôp, pôa Phạm Minh Chính, Ngế pro xiâm hnê ngăn Chin phuh tối nhên, pâk chik ma tŭi hiăng ƀă dế cho tơdroăng ki rơ-iô kân dêi kuăn mơngế. 

Ki rơ-iô xua ing pâk chik ga pro ó troh mâu tơdroăng cheăng kâ, ‘na túa lĕm tro, rêh ối pơlê pơla, ‘na kring vế tơniăn, ‘na cheăng lêng, pro ‘mêi ivá dêi mâu ngế tung kuăn pơlê, hlối cho xiâm pro chiâng ai mâu ngế pro xôi, mơnhâu  tơdroăng ki dế tơniăn, ki dế hơniâp ƀă ki vâ tơniăn ton dêi tơrêm kong têa, rêm hdroâng mơngế, rêm hdroâng kuăn ngo.

Teăng mâ Chin phuh, Ngế pro xiâm hnê ngăn tơnêi têa khĕn kơdeăn, rơkâu mâu hnoăng hiăng pêi ai pơxúa dêi mâu kăn ƀô̆, mâu lêng Kŏng an kuăn pơlê, rêm râ, mâu kơvâ cheăng tung hbrâ mơdât mơngế ki ai xôi ‘na ma tŭi tung  pơla hdrối mê hía nah, veăng ‘no hnoăng kal a tơdroăng mơnhông mơdêk ƀă rak tơniăn pơlê pơla dêi tơnêi têa. Vâ châ pơ’lêh rơdêi tơdroăng hbrâ mơdât ma tŭi, Ngế pro xiâm hnê ngăn tơnêi têa pơkâ thế. Tơdroăng cheăng hbrâ mơdât ƀă séa ngăn mơdât ma tŭi đi đo thế pơkâ mơdât ing hnoăng pơkuâ, hnê mơhno tơdrêng dêi mâu râ Đảng, tơdroăng rak ngăn dêi mâu kăn rêm râ, tung mê ai mâu lêng Kŏng an kuăn pơlê cho ki xiâm.