Kơxo lơ 16/3, pôa Phạm Minh Chính, Ngế pro xiâm hnê ngăn Chin phuh pêi cheăng ƀă kăn pơkuâ kong pơlê Hải Dương vâ mơnhên tối klêi kơ’nâi pêi pro hnoăng cheăng mơnhông mơdêk cheăng kâ rêh ối pơlê pơla, mơjiâng khu pơkuâ tơdroăng kal kí hơnăm 2022 ƀă troăng tơmiât mơnhông hneăng hơnăm ki pơtối; tơdrêng a mê hlối pơkâ tơleăng mâu tơdroăng ki pâ thế vâ pro tơ’lêi hlâu ăm Hải Dương mơnhông rĕng, krá tơniăn.

Tơpui mơgêi rôh hôp, pôa Phạm Minh Chính hiăng tối nhên ‘na ki ai hlâu ki rơdêi pơxúa tơxup tơbriât ƀă mâu tơdroăng ki tá hâi pêi pro klêi. Tung la ngiâ ah, Ngế pro xiâm hnê ngăn tơnêi têa pơkâ thế, kong pơlê kal pơkâ kơtăng, tơbleăng pêi pro tơƀrê tơdroăng pơkâ Hneăng hôp kân 13 dêi Đảng, mâu tơdroăng pơkâ dêi Tơnêi têa ƀă tơdroăng pơkâ hneăng hôp kân Đảng ƀô̆ kong pơlê; xúa, pêi pro tro troăng pơkâ dêi Đảng luât dêi Tơnêi têa ƀă tơdroăng ki hnê mhno pơkuâ dêi Chin phuh, Ngế pro xiâm hnê ngăn Chin phuh.

Ngế pro xiâm hnê ngăn Chin phuh pơkâ thế, kong pơlê Hải Dương tơrŭm ƀă Khu xiâm ngăn mơhno túa lĕm tro tơ’noăng ivá ƀă ôm hyô, kong pơlê Quảng Ninh ƀă mâu kong pơlê ki ai tơdjâk troh chêh pro klêi hồ sơ po rơdâ túa pơkâ tíu xối tơbâ “Yên Tử - Vĩnh Nghiêm - Côn Sơn, Kiếp Bạc”.

Tơdrêng amê hlối mơhnhôk mâu kơxô̆ liăn, malối cho tơrŭm cheăng tơdjuôm krê tung rak ngăn ‘no liăn cheăng ‘mâi rơnêu, pro, mơdêk ki kơnía ‘na mơhno túa lĕm tro, ton nah, ôm hyô dêi tíu kố.