Kơxo lơ 12/3, a Tíu pêi cheăng dêi Chin phuh, pôa Phạm Minh Chính, Ngế pro xiâm hnê ngăn Chin phuh pơkuâ po rôh hôp ƀă mâu khu xiâm, kơvâ cheăng, kong pơlê ‘na túa pơkâ tiô tối hdrối kô mơ’no liăn bro mâu troăng kân Ninh Bình – Nam Định – Thái Bình ƀă Gia Nghĩa (Dak Nông) – Chơn Thành (Bình Phước). Troăng kân Ninh Bình - Nam Định - Thái Bình ƀă ki xŏn ki vâi hriăn bro cho dâng 88km. Tơdroăng tơkêa pro troăng prôk Gia Nghĩa (Dak Nông) – Chơn Thành (Bình Phước) ƀă tâi tâng ki xŏn lối 128km. ‘Na péa tơdroăng tơkêa pro troăng kố, Khu xiâm ngăn troăng prôk ƀă rơxế kơtâu tối nhên, tơdroăng ki pơkâ mơ’no liăn cheăng cho tơdroăng ki kal, rak vế tơniăn ‘na pơlê pơla, gâk kring Tơbăng kroăng Hồng, kpong Đông Nam bộ tơdjêp Tây Nguyên.

Tơpui a rôh hôp, pôa Phạm Minh Chính, Ngế pro xiâm hnê ngăn Chin phuh tối nhên, troăng kân tơdjêp Ninh Bình – Nam Định – Thái Bình kô tơdjêp sap ing Hải Phòng, Quảng Ninh chiâng troăng ki mơnhông mơdêk nếo ƀă pro ivá mơnhông ăm tá kơpong; troăng tơdjêp sap ing Dak Nông lăm Bình Phước gá ‘nâng ‘nâi vâ tơdjêp lo a kơno tuk cho a Vũng Tàu, cho troăng ki xiâm tung la ngiâ tơdjêp Tây Nguyên lo Đông Nam Bộ pro tơ’lêi ăm mơnhông mơdêk tá kơpong.

Ngế pro xiâm hnê ngăn tơnêi têa pơkâ thế mâu kăn tơpui tơno ăm rơkong veăng tơpui tối vâ séa ngăn hiăng pêi châ tơdroăng klâi, tơvâ tơvân a lâi, tơdrêng a mê hlối mơhno nhên, kal athế khŏm mơ-eăm khât, pơkâ nhên tơdroăng, troăng hơlâ pơkâ ƀă tơkŭm pêi pro nhên, tung tơdroăng mê, mâu kơ koan athế kơhnâ veăng ƀă hiâm mơno ki pro pơxúa tơdjuôm cho tơdroăng ki xiâm.