Kơxo lơ 30/1, pôa Phạm Minh Chính, Ngế pro xiâm hnê ngăn Chin phuh rơtế ƀă khu kăn pêi dêi hnoăng cheăng dêi Chin phuh séa ngăn a tíu ki pêi tơdroăng tơkêa bro troăng kân kơpong Tơbăng kroăng Cửu Long, pôu mơhnhôk mơngế pêi cheăng a tíu ki bro troăng. Tíu troh ki apoăng Ngế pro xiâm hnê ngăn tơnêi têa ƀă khu kăn ki pêi dêi hnoăng cheăng pơtê chêng hiăng séa ngăn Troăng kân peăng mâ hâi lo a tơdroăng tơkêa bro Kông Mỹ Thuận 2.

Tơdroăng tơkêa bro kông Mỹ Thuận 2 ai tâi tâng ki xŏn dâng 6,61km prôk tơkâ luâ 2 to kong pơlê Tiền Giang prếi Vĩnh Long. Tơdjêp ƀă 2 to troăng kân Trung Lương – Mỹ Thuận ƀă Mỹ Thuận – Cần Thơ ối tung tơdroăng tơkêa bro troăng kân peăng mâ hâi lo pơla hơnăm 2017 – 2020. Troh nôkố, hnoăng cheăng gu tơbăng tơnêi tíu kông Mỹ Thuận 2 hiăng klêi; hnoăng cheăng tơbleăng bro troh nôkố châ lối 70% mâu tơdroăng tơkêa, pêi pro châ tơdroăng ki rơhêng vâ.

Tơdroăng ki troăng ƀă kông hiăng klêi, ‘na kông ki xiâm nôkố hiăng bro klêi, hiăng bro klêi trăng ăm tơdroăng ki apoăng, pêi klêi tơdroăng tơkêa tung hơnăm 2023. Ngế pro xiâm hnê ngăn tơnêi têa pơkâ thế tíu pei cheăng bro troăng xúa khoa hok kơmăi kơmok ƀă tâi tâng tá troăng hơlâ kih thuât ki rơkê má môi vâ mơdêk tơdroăng ki bro, la athế rak tơniăn, dâi lĕm, tơdrêng amê hlối hbrâ mơdât ki kâ kơluâ, bro mơhrê liăn ngân.