Tung mâu hơnăm hdrối, tơrŭm cheăng pơla Việt Nam ƀă Lếo rế châ ‘mâi mơnhông tơbrê trâu rơdâ, ai pơxúa tung tâi tâng mâu tơdroăng cheăng. Ing mê, veăng ‘no hnoăng ki kal a tơdroăng pơtối rak ki tơniăn kal kí, mơnhông cheăng kâ, rêh ối pơlê pơla, tơniăn cheăng lêng, kring tơniăn, mơdêk ki rơdêi dé péa Đảng, péa tơnêi têa.

Hneăng lăm pôu Việt Nam dêi pôa Thongloun Sisoulith, Kăn xiâm pơkuâ hnê ngăn Đảng, Kăn xiâm hnê ngăn kong têa Lếo ƀă kơdrâi pôa cho rôh vâ Kăn xiâm péa pâ tối ăm dêi rơpó ‘nâi mâu tơdroăng rêh ối cheăng kâ dêi rêm Đảng, rêm tơnêi têa; tơpui tối tro tơdroăng rêh ối tung kơpong ƀă lâp plâi tơnêi ki péa pâ rơtế vâ ‘nâi plĕng; tối nhên tơdroăng ki pêi klêi tung tơrŭm cheăng pơla péa pâ hdrối nah ƀă pơkâ troăng hơlâ mơdêk ki tơƀrê mâu tơdroăng tơrŭm tơrôa cheăng tung la ngiâ.