Kơxo hâi lơ 25/7, pôa Tô Lâm - Kăn xiâm hnê ngăn tơnêi têa hiăng tơdah Kăn xiâm hnê ngăn Đảng Nhân yân Kul CPP, pôa Hun Sen, Kăn xiâm hnê ngăn Kuô̆k hô̆i Kul, pôa Han Dock Soo, Ngế pro xiâm hnê ngăn kong têa Hàn Quốc, pôa Laid Rebiga - Ngế xiâm ngăn mâu lêng hneăng hdrối ƀă ngế ai hnoăng tơnêi têa Algeria, pôa Ajit Doval - Ngế kum pêi hnoăng cheăng kring tơniăn kong têa Ấn Độ.

A rôh tơdah, Kăn xiâm hnê ngăn mâu kong têa tối mơjo hơ-ui khât  kơ pôa Nguyễn Phú Trọng - Kăn xiâm pơkuâ hnê ngăn Đảng hiăng lêk hô  ƀă hlối veăng khéa, hơlêm troh kơ pôa Tô Lâm - Kăn xiâm hnê ngăn tơnêi têa, Kăn xiâm hnê ngăn Đảng, Tơnêi têa ƀă Kuăn pơlê Việt Nam.

Kăn xiâm hnê ngăn mâu kong têa nhoăm pâ ƀă hlối veăng môi tuăn tơdroăng kơnía ƀă hnoăng veăng ‘no ki kal dêi pôa Nguyễn Phú Trọng - Kăn xiâm pơkuâ hnê ngăn Đảng a tơdroăng mơnhông tơrŭm cheăng péa pâ pơla Việt Nam ƀă mâu kong têa; loi khât kơ pôa Tô Lâm - Kăn xiâm hnê ngăn tơnêi têa ƀă mâu Kăn xiâm Việt Nam mơnhông dêi tơnêi têa Việt Nam pơtối xông tơƀrê, pơtối rak mâu tơmeăm khoăng kơnía git ki pôa pôa Nguyễn Phú Trọng - Kăn xiâm pơkuâ hnê ngăn ‘măn ăm.

Pôa Tô Lâm - Kăn xiâm hnê ngăn tơnêi têa pơtroh rơkong mơnê kơ Tơnêi têa, Chin phuh, Kuô̆k hô̆i, kuăn pơlê ƀă mâu kăn dêi mâu kong têa hiăng mơdoh chôu mơnê mâu tơdroăng mơhno tuăn pâ kơ pôa Nguyễn Phú Trọng - Kăn xiâm pơkuâ hnê ngăn Đảng, xuân môi tiah rơtế ƀă mâu kăn ƀă kuăn pơlê Việt Nam tung mâu chôu phut châi heăng, mơhno tuăn pâ khât pơla Việt Nam ƀă mâu kong têa.