Tơpui pơxiâm po rôh hôp, pôa Tô Lâm, Kăn xiâm pơkuâ hnê ngăn cheăng Đảng pơkâ pêi 2 tơdroăng vâ Tơnêi têa hriăn ngăn, veăng tơpui. ‘Na Hnoăng cheăng hbrâ rơnáu po Hneăng hôp rôh má 14 dêi Đảng, kăn xiâm pơkuâ hnê ngăn cheăng Đảng tối nhên, a Rôh hôp kố, Khu xiâm pơkuâ tơdroăng kal kí pơchuât tơbleăng ăm Tơnêi têa ăm rơkong veăng tơpui tối ƀă mơ-éa pơtroh ‘na klêi kơ’nâi ƀă túa pơkâ tơbleăng mâu ngế pêi cheăng veăng tung Khu pơkuâ ngăn Tơnêi têa hneăng 14, veăng tung Ngế cheăng tung Vi ƀan séa ngăn Tơnêi têa hneăng 14 ƀă tơkŭm xo phĭu têk kŏng tơbleăng mâu ngế pêi cheăng tung Khu pơkuâ ngăn Tơnêi têa, Vi ƀan séa ngăn Tơnêi têa tiô pơkâ.

Tối nhên, kố cho tơdroăng cheăng “kố cho tơdroăng ki kal”, “ki xiâm dêi tơdroăng ki xiâm”, cho tơdroăng pơkâ ƀlêi chiâng dêi Hneăng hôp 14 dêi Đảng ƀă tơdroăng dêi tơnêi têa tung hneăng la ngiâ, pôa Tô Lâm, Kăn xiâm pơkuâ hnê ngăn cheăng Đảng pơkâ thế drêng rah xo tơbleăng ngế pêi cheăng athế séa ngăn tung tơdroăng pơkâ tŭm mâu tơdroăng, kơxô̆ ngế tiô pơkâ tơdroăng cheăng mâu ngế pêi cheăng Hneăng hôp 14 dêi Đảng ƀă mâu pơkâ ki tơdjâk.

Athế pơkâ ki pơxúa dêi Đảng, dêi tơnêi têa, dêi kuăn pơlê cho hdrối, pro tơdâng, tơniăn lĕm pơla tơdroăng pơkâ athế ai ƀă tơdroăng ki rah xo; pơla ki pơtó, tơniăn ƀă mơjiâng; pơla ki tơbleăng tối ƀă ki pơkâ xiâm; pơla ‘na tơdroăng cheăng pêi hnê cheăng ƀă tơdroăng ki tơná gá hâk vâ pêi, ivá pêi cheăng khât; pơla ki châ loi tơngah, ki rơkê plĕng tung tơdroăng cheăng ƀă troăng tơmiât mơnhông; tung mê malối mơdêk ki rơkê, tơƀrê, mâu tơdroăng ki hiăng pêi pro klêi, tơdroăng ki pleăng dêi hnoăng dêi ngế kăn ƀô̆ vâ ai tơdroăng tối, vê ngăn tung tơdroăng rah xo.