Pơcháu Pơkâ ƀă xông tơpui a roh leh, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa rơkâu péa ngế kăn ƀô̆ nếo châ Khu xiâm kal kí loi tơngah pơcháu tơdroăng cheăng, rah xo, pơcháu hnoăng cheăng nếo: pôa Trần Lưu Quang to pro Kăn xiâm pơkuâ cheăng kâ Tơnêi têa ƀă pôa Mai Văn Chính to pro Kăn xiâm pơtâng tối mơhnhôk kuăn pơlê Tơnêi têa.

Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên, pôa Trần Lưu Quang ƀă pôa Mai Văn Chính pơrá cho kăn ƀô̆ pơkuâ châ hnê mơjiâng tŭm, xông kân ing mâu kơ koan cheăng, tơkâ hluâ hên tíu pêi cheăng, veăng hên hneăng Tơnêi têa, ai hên túa ki rơkê tơtro tung pêi cheăng ƀă túa ki rơkê tung tơbleăng tơdroăng cheăng, pơkuâ, hnê mơhno, châ tơƀrê hên tung mâu kơvâ châ xing xoăng pơkuâ.

Xông tơpui klêi kơ’nâi tơdah pơkâ, pôa Trần Lưu Quang ƀă Mai Văn Chính mơnhên, kố cho hâk tơngăm ƀă xuân pôu râng hnoăng cheăng pro môi tiah lâi vâ rơtế tâi tâng Khu kêi đeăng hnoăng cheăng châ pơcháu ƀă tơdroăng cheăng hên a ngiâ Hneăng hôp má XIV dêi Đảng.

Pôa Trần Lưu Quang ƀă Mai Văn Chính pói vâ, drêng pôu râng hnoăng cheăng nếo cho Kăn xiâm pơkuâ cheăng kâ Tơnêi têa ƀă Kăn xiâm pơkuâ pơtâng tối mơhnhôk kuăn pơlê tơnêi têa kô pơtối châ Đảng, Tơnêi têa, khu râ kăn pơkuâ ƀă kăn ƀô̆ đảng viên mâu kơ koan Xiâm Đảng tơmâng, tŏng gum, tơrŭm krá tơniăn vâ rơtế khu pú hên Khu kêi đeăng rơkê hnoăng cheăng drêng pôu râng hnoăng cheăng nếo.