Teăng mâ kăn xiâm Đảng, Tơnêi têa, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa rơkâu pôa Nguyễn Minh Tâm châ pôk pro Kăn teăng mâ Việt Nam a kong têa Lếo. Pơcháu hnoăng cheăng ăm Kăn teăng mâ ki nếo pôk, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên. Việt Nam ƀă Lếo cho péa tơnêi têa ki achê dêi rơpó ai tơdroăng tơrŭm krá kak, tơrŭm cheăng ki kal, hmâ khât, pâ dêi rơpó; ai hnoăng cheăng ki kal ƀă tơdroăng kring tơniăn mơnhông tơƀrê dêi Việt Nam, hlối cho tơdroăng pêi ahdrối tung luât pơkâ tơpui kâ dêi Việt Nam.

Kăn xiâm pơkuâ hnê ngăn Đảng, Kăn xiâm hnê ngăn tơnêi têa púi vâ pôa Nguyễn Minh Tâm pơtối râk hnoăng cheăng cho ngế ki xiâm teăng mâ, cho tíu tơdjêp tơrŭm krá ƀă mơnhông tơƀrê dêi Lếo ƀă Việt Nam, tá tơdroăng kal kí - tơpui kâ, cheăng kâ - tê mơdró, mơhno túa lĕm tro - ôm hyô... mơnhông khu mơdró ki kân ƀă nhoăm dêi Việt Nam troh lăm ‘no liăn pêi cheăng a Lếo, veăng ‘no hnoăng mơnhông cheăng kâ - rêh ối dêi kong têa Lếo.