Kơxo kố, hâi lơ 18/8, tung hâi pêi cheăng apoăng dêi roh lăm pôu, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa hiăng trâm mâ tơpui tơno ƀă pôa Hoàng Khôn Minh, Kăn pơkuâ hnê ngăn cheăng Đảng kong pơlê Quảng Đông. Pơtối mê, pôa Tô Lâm hiăng trâm mâ kăn teăng mâ mâu ngế ki rơkê nhŏng o Sinuâ  a pơlê kong kân Quảng Châu.

Kơxê măng lơ 18/8, a Bắc Kinh, pôa Tô Lâm, hiăng troh lăm pôu, pêi cheăng ƀă Kăn teăng mâ Việt Nam a Sinuâ. Pôa Tô Lâm pơkâ thế Kơ koan teăng mâ Việt Nam pơtối pêi pro châ tơƀrê tâ nếo mâu troăng tơrŭm cheăng ki ai nôkố pơla péa tơnêi têa; pơkâ thế mâu troăng tơrŭm cheăng nếo tơtro ƀă tơdroăng nôkố dêi péa tơnêi têa, djâ ki pơxúa ăm tŭm péa tơnêi têa, tơtro ƀă luât lâp plâi tơnêi, xua hơniêp lĕm ƀă mơnhông; pơtối thăm tơrŭm cheăng pơla péa tơnêi têa, mơdêk mâu tơdroăng trâm mâ tơpui tơno kuăn pơlê.