Tung rôh  lăm pôu râ kăn xiâm Tơnêi têa troh Sinuâ, kơxê hâi lơ 19/8, a Hngêi ăm tơmối kâ koi pơtê Điếu Ngư, Bắc Kinh, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa hiăng tơpui ƀă pôa Lý Cường, Ngế pro xiâm hnê ngăn kong têa Sinuâ.  A rôh tơpui tơno, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối, Việt Nam ngăn mơnhông tơrŭm cheăng ƀă kong têa achê tơrŭm tơrôa, tơrŭm tung tŭm tơdroăng ƀă Sinuâ cho troăng rơhlâ thế pêi pro, rah xo troăng hơlâ, kum pêi ahdrối tung troăng rơhlâ tơniăn pơkuâ dêi, hên troăng, hên túa dêi Việt Nam.

Pôa Lý Cường pơkâ thế péa tơnêi têa pơtối mơnhông tơrŭm cheăng ƀă kong têa ki achê, tơrŭm tơrôa ‘na mơnhông trâm mâ kuăn pơlê ƀă mâu rơxông nếo pơla péa tơnêi têa, tơbleăng mâu tơdroăng tơkêa bro kuăn pơlê rêh ối ƀă tơrŭm tung kơvâ hnê cheăng pêi, pơtối rak vế pêi pro hnoăng cheăng tơrŭm cheăng pơla Việt Nam - Sinuâ; tối nhên tơdroăng mơ-eăm dêi chuh ngiah hên troăng tơdrăng ƀă chuh ngiah kơpong po, hbrâ rơnáu mơdêk tơrŭm a mâu hneăng hôp hên troăng.

Péa pâ xuân tơpui tơno ‘na mâu tơdroăng lâp plâi tơnêi, kơpong ki rêm pâ rơhêng vâ ‘nâi plĕng, môi tuăn séa ngăn ƀă tơleăng mơnhên tơxâng ki ôh tá môi tuăn, pơtối rak ki hơniâp lĕm, tơniăn a têa kơxĭ, ‘mâi mơnhông tơdroăng tơ’lêi hlâu ăm ‘na mơnhông tơnêi têa.