Kơxo hâi lơ 15/8, a Tíu pêi cheăng xiâm Đảng, tơbâ 79 hơnăm hâi Kăch măng Khế tơheăm ƀă hâi mơjiâng Tơnêi têa Kŏng hoa xah hô̆i chuh ngiah Việt Nam lơ 2/9, Khu xiâm kal kí tơkŭm po Hôp trâm mâ mâu kăn xiâm Đảng, Tơnêi têa vâ  pơ eăng  ‘na tơdroăng cheăng dêi Đảng, tơnêi têa tung mâu khế apoăng hơnăm 2024, tơdroăng cheăng pêi tung mâu khế mơ’nui hơnăm 2024 ƀă tung la ngiâ. 

Tơbleăng a hneăng hôp, teăng mâ mâu kăn xiâm pơkuâ hnê ngăn Đảng, Tơnêi têa, pôa Tô Lâm - Kăn xiâm pơkuâ hnê ngăn Đảng, Kăn xiâm hnê ngăn tơnêi têa mơnê mâu kăn, mâu kăn hneăng hdrối dêi Đảng, Tơnêi têa, Măt trâ̆n Tơnêi têa Việt Nam veăng trâm mâ ai hên tơdroăng pơxúa mê; nhoăm pơtroh rơkong rơkâu troh mâu kăn xiâm hneăng hdrối ƀă on veăng rơpŏng hngêi ai ivái mo sêi hơniâp ro ƀă trâm tŭm tơdroăng lĕm tro.

Pôa Tô Lâm - Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên, Khu xiâm  Kal kí, Khu kăn pơkuâ hnê ngăn Đảng dế pêi kơtăng tơdroăng hnê mơhno tơkŭm pêi dêi mâu kăn, pêi tơniăn, tơƀrê, rĕng pêi klêi mâu tơdroăng pơkâ, tơdroăng cheăng ki Pơkâ Hneăng hôp má 13 dêi Đảng hiăng pơkâ; pêi ahdrối tah mâu tơdroăng xơpá pơloăng mơnúa ‘na luât, pro tơ’lêi hlâu má môi ăm tŭm tơdroăng cheăng tiah hmâ tung tơdroăng ‘na luât, veăng mơjiâng Tơnêi têa, mơnhông tơdroăng rêh ối dêi kuăn pơlê dêi Khu tơrŭm cheăng, mâu ngế mơdró kâ tung tơnêi têa ƀă kong têa ê.