Tơbleăng a rôh hôp, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tơmâng xo, khĕn kơdeăn mâu hnoăng ki mơ-eăm dêi mâu kăn Hnê mơhno tung tơdroăng hbrâ mâu hlá mơ-éa chêh tơbleăng mơgêi. Pakĭng mê, pơkâ thế pơtối hbrâ rơnáu, mơnhên tơ’nôm tơdroăng mê cho: Tối ‘na xiâm dêi tơdroăng ki kal kal hlê nhên tâ xiâm ai tơdroăng gá.

Kăn xiâm pơkuâ hnê ngăn Đảng, Kăn xiâm hnê ngăn tơnêi têa, tối nhên, tơdroăng Mơgêi mâu tơdroăng tơpui kâ ƀă tơdroăng ai khât tung tơdroăng pơ’lêh nếo  tiô troăng hơlâ Xah hô̆i chuh ngiah tung 40 hơnăm hdrối a Việt Nam cho môi tơdroăng cheăng ki kal ƀă tơdroăng pơ’lêh nếo, mơjiâng ƀă mơnhông tơnêi têa. Xua mê klêi rôh hôp, kal pơtối pêi klêi Hlá mơ-éa chêh tơbleăng pơtroh ăm Khu xiâm kal kí ăm hnê tối ƀă kơ’nâi mê pơtối pê klêi môi hdroh nếo vâ pơtroh ăm Tíu xiâm tơnêi têa rôh má 10 la ngiâ.