A rôh hôp, pôa Tô Lâm - Kăn xiâm pơkuâ hnê ngăn Đảng, Kăn xiâm hnê ngăn tơnêi têa khĕn kơdeăn Tôh rah chêh mâu tơdroăng vâ hôp hiăng pêi cheăng ƀă tuăn hiâm hbrâ rơnáu, ‘nâi hnoăng cheăng pêi tơná vâ mâu Tiêuh ƀan tơbleăng hlá mơ-éa chêh Tơbleăng tơdroăng kal rôh má 5. Pakĭng mê, tối pơơchân Tôh rah chêh thế tăng ngăn nhên mâu pơkâ  dêi Khu kăn xiâm Đảng, Khu xiâm kal kí, Khu kăn pơkuâ hnê ngăn Đảng, mâu pơkâ dêi Kuô̆k hô̆i ƀă Chin phuh... Malối cho mâu hlá mơ-éa chêh châ pơkâ tơbleăng tung hneăng ki kố. 

Pôa Tô Lâm - Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên, tơbleăng kal kí dêi Hneăng hôp má 14 thế cho tơmeăm ki kơnía ‘na tuăn ngôa, cho kal nhên ‘na tuăn ngôa pú hên dêi tâi tâng Đảng, tâi tâng kuăn pơlê, tâi tâng mâu lêng, môi tiah pôa Nguyễn Phú Trọng - Kăn xiâm pơkuâ hnê ngăn Đảng ki hneăng hdrối hiăng hnê mơhno, thế pơtối rak vế pêi pro tơdroăng môi tuăn dêi rơpó ƀă tuăn ngôa rơkê pú hên, thế ai hnoăng veăng ‘no dêi mâu kơ koan, kơvâ cheăng xiâm tơnêi têa ƀă mâu kong pơlê, mâu khu tơrŭm cheăng kal kí ƀă pơlê pơla ƀă kuăn pơlê.