Tơpui a rôh leh, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên, hâi lơ 2/9/1945, a plông kân Ba Đình, pôa Hồ Chí Minh, Kăn xiâm hnê ngăn tơnêi têa hiăng pơchuât hlá mơ-éa mơjiâng tơnêi têa tơniăn krê, po leh krip tơbleăng ăm lâp plâi tơnêi ‘nâi hâi mơjiâng mơjiâng tơnêi têa Việt Nam Yân chuh Kŏng hoa, nôkố cho tơnêi têa Kŏng hoa xah hô̆i chuh ngiah Việt Nam.

Plâ 79 hơnăm hdrối, ing hnoăng pơkuâ hnê mơhno dêi Đảng, tiô rơkong krếo dêi Pôa, tâng rơkong tơhrâ tơniăn krê, ƀă tuăn mơno ôh tá la lâi hía “Ôh tá ai ki klâi kơnía tâ tơniăn krê’’, tâi tâng hdroâng mơngế Việt Nam hiăng tơrŭm môi tuăn dêi rơpó, tơrŭm chiâng môi, rơtế tơrŭm ƀă lâp plâi tơnêi, chông djâ kăch măng Việt Nam châ ƀlêi trâng ki kố troh ƀlêi trâng ki tá,  bro tơbleăng lĕm hdroâng mơngế, lâp tơnêi têa tơrŭm chiâng môi, pêi pro tiô tơdroăng châ tơƀrê hơ’lêh nếo, krá tơniăn prôk tiô chuh ngiah xah hô̆i.

Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối, ai hnoăng pêi pro kân kơ’nâi 79 hơnăm mơjiâng tơnêi têa, xua ing tuăn pâ nhuô̆m tơnêi têa, ing tơdroăng tơrŭm tâi tâng hdroâng mơngế, tuăn mơ-eăm, púi vâ rơdêi ‘na tơniăn krê, hơniâp dêi Đảng, Tơnêi têa ƀă kuăn pơlê Việt Nam.