Roh hôp hiăng tơpui tơno ‘na tơbleăng tơdroăng, hnoăng ki châ tơƀrê pêi pro Tơdroăng pêi cheăng 6 khế apoăng hơnăm 2024 ƀă hnoăng cheăng xiâm 6 khế mơ’nui hơnăm 2024; tơbleăng tơdroăng châ tơƀrê hnê mơhno, tơleăng mâu roh tơdroăng, roh tơdroăng xôi ối tung Khu hnê mơhno séa ngăn, hnê mơhno ing klêi kơ’nâi roh hôp má 25 dêi Khu hnê mơhno troh nôkố; ƀă tơbleăng tơdroăng châ tơƀrê pêi cheăng dêi Khu hnê mơhno hbrâ, mơdât kâ kơhveăm liăn ngân, tơdroăng ki ôh tá lĕm tro râ kong pơlê 6 khế apoăng hơnăm 2024.

Xông tơpui a roh hôp, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn Tơnêi têa – Kăn xiâm pơkuâ Khu hnê mơhno pơkâ mâu khu râ kăn pơkuâ hnê ngăn Đảng, khu tơrŭm cheăng Đảng, kơ koan cheăng ôh tá chiâng tơngôu, môi tuăn ƀă mâu tơdroăng châ tơƀrê hiăng châ, mê thế pơtối pêi pro ó rơdêi, tơdâng tơ’mô, mâu troăng, khŏm pêi, khŏm mơ-eăm tơplâ, mơdât kâ kơhveăm liăn ngân, tơdroăng ki ôh tá lĕm tro tiô tro troăng ‘’Ôh tá tot, ôh tá pơtê, ôh tá ai kơpong ki mơdât, ôh tá ai pakong, mơhé ngế ki mê cho kơbố; xăm tối môi roh, pro ăm plĕng tá kơpong, tá kơvâ’’.

Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối rơdêi 3 pơkâ: Hbrâ mơdât kâ kơhveăm liăn ngân thế gum mơnhông cheăng kâ – rêh ối pơlê pơla; thế châ pêi pro troh tíu pêi cheăng Đảng, chi ƀô̆, thế châ tơdroăng séa ngăn dêi kăn ƀô̆, đảng viên ƀă kuăn pơlê...