Kố cho hơnăm hriâm ai hdró ki kal drêng Tơdroăng hnê hriâm phôh thong nếo, pêi pro tơdâng tơ’mô ing lâm 1 troh lâm 12. Klăng roh pơxiâm po hơnăm hriâm nếo 2024 – 2025, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa hiăng ai kơthô pơtroh kơvâ Hnê hriâm.

Tung kơthô ai chêh: Klăng roh pơxiâm po hơnăm hriâm nếo 2024 – 2025, á pơtroh rơkong rơkâu troh mâu thái yăo, cô yăo, kăn ƀô̆ pơkuâ, mơngế pêi cheăng hiăng ƀă dế pêi cheăng tung kơvâ Hnê hriâm, rơtế ƀă mâu vâi o hok tro, sinh viên, ngế hriâm ƀă mâu nôu pâ hok tro mâu tơdroăng tuăn pâ nhŏng o ƀă mâu rơkong rơkâu lĕm má môi.

Ƀă tơdroăng phiu ro dêi hơnăm hriâm nếo, á loi tơngah mâu vâi o hok tro, sinh viên, ngế hriâm kô mơ-eăm hriâm tâp, tơmâng xo mâu tơdroăng ki rơkê, mơjiâng mâu ivá ki xiâm, mơjiâng mâu tơdroăng pói vâ kân vâ mơjiâng tơnêi têa rế hía rế kro mơdrŏng, hơniâp lĕm. Rơkâu mâu thái yăo, cô yăo, kăn ƀô̆ pơkuâ, mơngế pêi cheăng kơvâ Hnê hriâm ƀă mâu vâi o hok tro, sinh viên, ngế hriâm đi đo mo châ, hơniâp lĕm, châ tơƀrê hên tâ mê nếo tung hơnăm hriâm nếo.