Kơtăn kố châ 80 hơnăm, hâi lơ 15/10/1945, pôa Hồ Chí Minh, Kăn xiâm hnê ngăn tơnêi têa hneăng apoăng kĭ luât mơjiâng 12 kơpong tơplâ, tung mê ai Kơpong tơplâ 4 – khu apoăng dêi Khu mô đô̆i Kuân khu 4 hâi kố. Xông tơpui a roh leh, pôa Tô Lâm, Kăn xiâm pơkuâ hnê ngăn Đảng tối rơdêi, tơkâ hluâ 80 hơnăm mơjiâng, tơplâ ƀă xông kân, khu mô đô̆i Kuân khu 4 hiăng châ tơƀrê hên, kum tung ƀlêi trâng dêi tơdroăng tơleăng lĕm hdroâng mơngế, mơjiâng ƀă gâk kring Tơnêi têa.

Kăn xiâm pơkuâ hnê ngăn Đảng pơkâ thế Kuân khu 4 pơtối hlê plĕng pêi pro trâu hơngế troăng tơmiât pêi cheăng lêng Hồ Chí Minh, troăng prôk gâk kring tơnêi têa tâi tâng kuăn pơlê dêi Đảng; thăm pêi tơdroăng mơhnhôk kuăn pơlê, thăm pro krá tơniăn tơrŭm cheăng khu lêng – kuăn pơlê, veăng gum mơjiâng tơdroăng gâk kring tung hiâm mơno kuăn pơlê ƀă tơdroăng tơrŭm tâi tâng hdroâng mơngế krá tơniăn.