Kơxêi hâi lơ 17/3, a Hà Nôị, pôa Tô Lâm, Ngế xiâm ngăn Kŏng an hiăng tơdah pôa Kongthong Phongvichit, Ngế xiâm phŏ ngăn ‘na Kŏng an kong têa Lếo dế lăm pôu, pêi cheăng a Việt Nam. Pôa Tô Lâm mơnhên tối, kơdeăn Khu pơkuâ ngăn Kŏng an kong têa Lếo ƀă Việt nam hiăng kơhnâ khât tung tơrŭm cheăng, hbrâ rơnáu ƀă po hneăng hôp kân kring vế, gak ngăn tơniăn pơla Việt Nam ƀă Lếo roh má 13 ai hên hnoăng cheăng ki tơpui tơno, tơpui hbah, tơpui leăng ƀă hiăng châ rŭm vâ môi tuăn.

Ki rơhêng vâ tối, péa pâ hiăng kĭ tơkêa tung Hlá mơ-eá roh hôp tơkêa ‘na kring vế, gak ngăn pơla Việt Nam ƀă Lếo roh má 13 ai hên tơdroăng cheăng ki tơrŭm ki nếo. Pôa Tô Lâm tối nhên, Khu xiâm ngăn Kŏng an pói rơhêng vâ rơtế ƀă Khu xiâm ngăn Kŏng an kong têa Lếo rak vế krá tơniăn tơnêi têa, djâ troăng pơkuâ ngăn dêi, ôh tá ăm mâu kong têa ê xo tơdroăng ki châ pơkuâ hnê kong têa kố, ah lơ chiâng pro tơdjâk troh tơdroăng kring vế, gak ngăn tơniăn dêi kong têa ki ê, ah chiâng ai tơdroăng ki tơklâ pơla peá pâ tơnêi têa, klêi mê, vêh mơnhên, Khu xiâm ngăn Kŏng an Việt Nam hbrâ vâ tŏng kum ăm Lếo kring vế tơniăn tơdroăng rêh ối, cheăng kâ malối cho tung Hơnăm ki kong têa Lếo pro Kăn xiâm hnê ngăn kơpong a hơnăm 2024.