Hâi lơ 6/3, a Hà Nội, pôa Tô Lâm, ngế xiâm ngăn Kŏng an tơdah Ngế xiâm chêh tôm xo rơkong Hô̆i đong Gâk kring tơnêi têa Nhuk - pôa Akiba Takeo dế ai rôh pôu pêi cheăng a Việt Nam. A rôh tơdah, pôa Tô Lâm tối nhên, klêi kơ’nâi ai pơreăng COVID-19, Khu xiâm ngăn Kŏng an Việt Nam tơkŭm rak vế tro tơdroăng gâk kring kal kí, tơniăn tung lâp pơlê pơla kum cheăng kâ tơnêi têa mơdêk ngiât ƀă mơnhông cheăng kâ rêh ối pơlê krá tơniăn, kơjo kum mơnhông pêi chiâk deăng hưh cơ, uâ pơliê kế tơmeăm pêi lo ing chiâk deăng, kế kâ tê ngi kong têa ê, mơdêk rơdêi hơ’lêh kơxô̆ tung mâu kơvâ pêi chiâk deăng, pơrá cho mâu kơvâ ki ai hên rôh tơ’lêi ăm khu mơdró kâ Nhuk veăng ‘no liăn cheăng a Việt Nam.

Vâ pơtối mơdêk tơrŭm ai pơxúa, tơƀrê, trâu rơdâ, pôa Tô Lâm pơkâ thế, tung la ngiâ ah, péa pâ kô tơno ăm dêi rơpó mâu tơdroăng ki rơkê tung hơ’lêh rak ngăn hlá mơ-éa. Pôa Tô Lâm pơkâ thế peăng Nhuk môi tuăn ƀă tŏng kum mâu tơdroăng cheăng rak vế hơniâp lĕm Khu lâp kong têa dêi khu Kŏng an nhân dân Việt Nam.