Kơxê lơ 1/3, Đăi tươ̆ng Tô Lâm, Kăn cheăng tung Khu xiâm kal kí, Ngế xiâm pơkuâ Kŏng an, pơkuâ roh trâm mâ mâu Kăn pơkuâ Kơ koan teăng mâ Việt Nam a kong têa ê. Pôa Tô Lâm tối loi tơngah, mâu kăn teăng mâ, Kăn pơkuâ kơ koan teăng mâ Việt Nam a kong têa ê kô mơnhông hnoăng cheăng, cho kông tơdjêp vâ mơnhông tơrŭm cheăng tơpui kâ ƀă kong têa ê Việt Nam ƀă mâu kong têa, mơdêk tíu cheăng dêi Việt Nam tung lâp plâi tơnêi ƀă cho tíu hgiên krá tơniăn dêi pơlê pơla mơngế Việt Nam a kong têa ê.

Pôa Tô Lâm kheăn kơdeăn tơdroăng tơmâng, tơrŭm krá tơniăn ki Khu xiâm tơpui kâ ăm tơdroăng tơrŭm cheăng, tơrŭm lâp plâi tơnêi dêi Khu xiâm pơkuâ Kŏng an tung pơla kố nah; mơnhên tơdroăng tơpui kâ ƀă kong têa ê dêi khu Kŏng an dế pơtối pơ’lêh nếo, châ tơƀrê hên; pói vâ Khu xiâm tơpui kâ tối tơdjuôm ƀă mâu Kăn teăng mâ, Kăn pơkuâ kơ koan teăng mâ Việt Nam a kong têa ê tối krê pơtối tơmâng tŏng kum, tŏng kum Khu xiâm pơkuâ Kŏng an po rơdâ tơrŭm cheăng lâp plâi tơnêi.