Kơxê lơ 13/2, a Hà Nội, Đăi tươ̆ng Tô Lâm, Ngế cheăng tung tíu xiâm kal kí, Ngế xiâm ngăn Kŏng an tơdah jâ Katherine Tai, Kăn teăng mâ Kơ koan tê mơdró Mih dế ai rôh lăm pôu ƀă pêi cheăng a Việt Nam. Pôa Tô Lâm tối nhên, Việt Nam đi đo ngăn Mih cho môi tung mâu kong têa tơrŭm ki kal xiâm, ăm ‘nâi tơdroăng pơkâ, tơbleăng mâu troăng hơlâ, túa pơkâ luât dêi Việt Nam rak vế tơtro ƀă ki pơxúa, mâu tơdroăng ki rơhêng vâ kong têa ê ƀă tơdroăng luât Việt Nam.

Tung mê, tơdroăng ki rak vế tơniăn hnoăng pơxúa ăm mâu ngế pêi cheăng rak tơniăn pêi pro tro pơkâ dêi Khu tơrŭm ngăn tơdroăng pêi cheăng kong têa ê; tơdroăng ki rak vế pơtroh hlá mơ-éa kal ing troăng tơkăng kong châ rak vế loi tơngah ƀă tơniăn. Vâ bro ivá, mơdêk tâ nếo tơrŭm cheăng kâ – tê mơdró – ‘no liăn cheăng pơla péa tơnêi têa tung la ngiâ, pôa Tô Lâm pâ thế Kơ koan teăng mâ tê mơdró Mih pơtối mơdêk hnoăng cheăng cho tíu tơdjêp ki kal pơla Chin phuh péa tơnêi têa vâ mơdêk tơrŭm kong têa tơrŭm tung tâi tâng Việt Nam – Mih.