A kong pơlê Hậu Giang, pôa Trần Hồng Hà, Ngế pro xiâm phŏ hnê ngăn tơnêi têa rơtế ƀă khu kăn tung Chin phuh ai rôh pêi cheăng ƀă mâu khu xiâm ƀă mâu kong pơlê kơpong tơbăng kroăng Cửu Long hôp ‘na xiâm tơmeăm khoăng vâ pêi pro mâu tơdroăng tơkêa bro ‘na troăng prôk ki xiâm tung kong pơlê.

Tiô Ngế xiâm ngăn troăng prôk rơxế kơtâu, nôkố tung kơpong tơbăng kroăng Cửu Long dế tơbleăng pêi rôh apoăng 8 tơdroăng tơkêa pro troăng kân tơdrăng lĕm ƀă 5 tơdroăng tơkêa bro mơdêk, po rơdâ, mơjiâng pro nếo mâu troăng kân ƀă pro kông a troăng kân, ƀă tâi tâng kơxô̆ liăn ‘no mơjiâng pro dâng 112 rơpâu 600 rơtal liăn. 

Sap nôkố troh hơnăm 2025, kal  ai prê vâ mơjiâng pro tơdroăng tơkêa troăng prôk tơdrăng lĕm a kơpong tơbăng kroăng Cửu Long kal ai hên, dâng lối vâ chê 50 rơtuh m3.

Tối mơgêi a rôh pêi cheăng, pôa Trần Hồng Hà ăm ‘nâi, tiô kơxô̆ chêh tối, riân ngăn mê tơmeăm kal vâ pêi xuân bê tiô tơdroăng púi vâ  pro tơdroăng tơkêa bro, ki tơxâng vâ tối ai tơ’nôm tơmeăm vâ pro cho tơnêi a Long An, laga Ngế xiâm ngăn troăng prôk rơxế kơtâu kal rĕng tối ‘na kih thuât dêi xiâm. Mâu kong pơlê tơbăng kroăng Cửu Long, Ngế pro xiâm phŏ hnê ngăn Chin phuh pơkâ thế hbrâ rơnáu ăm tâk 50% ivá pêi cheăng dêi mâu tíu dế xo prêi.