Troăng kân ăm phêp rơxế kơtâu têi Tân Phú - Bảo Lộc xŏn 66km, kân 4 hơlâ troăng, tâi tâng kơlo mơ’no liăn 17.200 rơtal liăn tiô troăng khu tơrŭm mơ’no liăn cheăng tơnêi têa ngế krê. Tiô troăng hơlâ mơ’no liăn cheăng châ kĭ, ki hên kơxô̆ Tơnêi têa veăng tơdroăng tơkêa bro cho 6.500 rơtal liăn (châ vâ chê 38%), ki ê cho kơxô̆ liăn dêi mâu khu mơ’no liăn cheăng ƀă kơxô̆ liăn mơhnhôk ing ê. Pơtối tơdroăng tơkêa kố cho tơdroăng tơkêa bro troăng kân ăm phêp rơxế kơtâu têi Bảo Lộc – Liên Khương, xŏn 73,6km, tâi tâng kơlo liăn mơ’no 19.521 rơtal liăn. Tung mê, kơxô̆ liăn tơnêi têa 7.761 rơtal liăn (châ vâ chê 39,8%), ki ê cho kơxô̆ liăn dêi mâu khu mơ’no liăn cheăng ƀă kơxô̆ liăn mơhnhôk ki ing ê.

Tiô pôa Trần Hồng Thái, Kăn hnê ngăn Vi ƀan hnê ngăn kong pơlê Lâm Đồng, xua kơxô̆ liăn Tơnêi têa veăng mâu tơdroăng tơkêa bro iâ, ôh tá xúa troăng tŏng kum ki kơdroh pêi lo liăn xua mê tơdroăng chiâng chiâng pêi pro ôh tá hên, kơdroh tơdroăng ki hâk vâ ƀă khu mơ’no liăn cheăng ƀă mâu khu ai liăn ăm mung. Pakĭng mê, tŭm 2 tơdroăng tơkêa bro pơrá kreăng Pơkâ pêi séa ngăn, chiâ xo, pro ƀă xúa tơmeăm khoăng tung kơdâm tơnêi tiô Pơkâ 866, hâi lơ 18/7/2023 dêi Ngế pro xiâm hnê ngăn Chin phuh. Pôa Trần Hồng Thái, tối:

“Tŭm 2 tơdroăng tơkêa bro pơrá ai mâu pá puât môi tiah dêi pó, mâu tơdroăng cheăng dêi 2 tơdroăng tơkêa bro châ kong pơlê Lâm Đồng thăm pêi pro ƀă pơrá tung tơdroăng ki chiâng pêi pro rĕng tâng tơtro troăng pơkâ pêi, ƀă ko chiâng pêi pro tung hơnăm 2024 vâ troh hơnăm 2025 cho hơnăm ki pêi rĕng. Má péa nếo, troăng kân ăm phêp rơxế kơtâu têi mê ki xŏn ôh tá pơhlêh laga ai tơdroăng ki pơhlêh xua xiâm kối tơdjêp pa kong hlối tá tơdroăng ki ôh tá vâ bê tơmâng. Laga, xua kố ôh tá xê mâu tơmeăm ki pơklât thế pơhlêh troăng pơkâ pêi mơ’no liăn cheăng, bu pơhlêh tiô tung khu xua mê pói vâ rak troăng hơlâ mơ’no liăn cheăng’’.

Vâ tah lôi mâu tơdroăng pá puât, tơvâ tơvân kố, kong pơlê Lâm Đồng pâ thế Ngế pro xiâm hnê ngăn Chin phuh séa ngăn tơ’nôm kơxô̆ liăn ngân Tơnêi têa ăm mâu tơdroăng tơkêa bro kơxô̆ liăn 3.332 rơtal liăn, tung mê 2.410 rơtal liăn ăm kơpong Tân Phú - Bảo Lộc ƀă 922 rơtal liăn ăm kơpong Bảo Lộc – Liên Khương. Tơdrêng amê, ăm phêp tơdroăng tơkêa bro troăng kân Tân Phú - Bảo Lộc châ xúa troăng tŏng kum pêi lo liăn kơdroh, tiô pơkâ a Troăng 82 Luât mơ’no liăn cheăng tiô troăng khu tơrŭm cheăng tơnêi têa ngế krê.

Xông tơpui a roh pêi cheăng, pôa Trần Hồng Hà, Ngế pro xiâm phŏ hnê ngăn tơnêi têa mơnhên ôh tá chiâng mơdêk kơxô̆ liăn ngân Tơnêi têa a 2 tơdroăng tơkêa bro kố. Laga, vâ pro ƀai toăn liăn ngân, Ngế pro xiâm phŏ hnê ngăn Chin phuh pơkâ mâu khu xiâm, kơvâ cheăng ki tơdjâk ai mơ-éa tơbleăng ƀă Ngế pro xiâm hnê ngăn Chin phuh vâ tah lôi pá puât tung tơdroăng tăng kơxô̆ liăn mung ing hngêi arak liăn. Xua tiô pơkâ nôkố, kơlo liăn khu pơkuâ dêi khu mơ’no liăn cheăng ôh tá tơniăn 20% tâi tâng kơxô̆ liăn mơ’no dêi tơdroăng tơkêa bro mê ôh tá tŭm pơkâ vâ châ mung liăn.

“Á pơkâ ‘na peăng Chin phuh mê Khu xiâm pơkuâ liăn ngân thế ai hriăn plĕng vâ tơbleăng Ngế pro xiâm hnê ngăn Chin phuh séa ngăn vâ ai pơkâ dêi Chin phuh lơ rơnêu Pơkâ 78, tung pơla pêi pro tơdroăng kố rế rĕng rế lĕm tro. Xua mâu troăng hơlâ Tơnêi têa pơhlêh hên, ôh tá môi tuăn sap apoăng troh tá tui lui ƀă ki ôh tá tơniăn tung mơ’no liăn cheăng, tá mâu khu mơ’no liăn cheăng xuân môi tiah mâu hngêi arak liăn rơtế pêi xua mê kal ai mơ-éa tơbleăng ăm Ngế pro xiâm hnê ngăn Chin phuh vâ ai hnê mơhno vâ pin pêi cheăng kố môi tuăn sap apoăng troh tá tui lui, vâ rak ăm châ mâu tơkêa ing peăng Tơnêi têa’’.

‘Na tơdroăng tơkêa bro troăng kân ăm phêp rơxế kơtâu têi ôh tá tiô pơkâ pêi ‘na tơmeăm khoăng tung kơdâm tơnêi, pôa Trần Hồng Hà, Ngế pro xiâm phŏ hnê ngăn tơnêi têa pơkâ thế kong pơlê Lâm Đồng ƀă mâu khu mơ’no liăn cheăng tơbleăng ƀă mâu kơ koan pơkuâ tơnêi têa vâ ai hnê mơhno pêi pro mâu troăng ki tơtro.

Hdrối mê, a roh pêi cheăng, khu râ kăn pơkuâ Vi ƀan kong pơlê Khánh Hòa hiăng tơbleăng tơdroăng hriăn plĕng apoăng chiâng pêi pro Tơdroăng tơkêa bro troăng kân ăm phêp rơxế kơtâu têi Nha Trang – Đà Lạt. Pơtối mê, tơdroăng tơkêa bro ai ki xŏn lối 80 km, kân 4 hơlâ troăng, chiâng phêp kơtâu têi tiô pro 80 troh 100km/h. Tâi tâng kơlo liăn mơ’no pro troăng kân cho 25.000 rơtal liăn, tiô troăng tơrŭm cheăng tơnêi têa ngế krê PPP, tơkêa pêi BOT ai tơdroăng tŏng gum dêi Tơnêi têa, ƀă kơxô̆ liăn pơkâ cho 70% kơxô̆ liăn tơnêi têa, ki ê cho khu mơ’no liăn cheăng; hâi khế vâ châ xo tơvêh dêi kơxô̆ liăn cho 26 hơnăm 9 khế.

Tơdroăng tơkêa bro ai tâi tâng ƀăng deăng 627 ha, tung mê ai 409 ha kong rak loăng pơlái kong kế, kong tât khía rak kơnhŏng têa ƀă mơjiâng pro tơmeăm. Klêi kơ’nâi xúa mâu troăng kih thuât môi tiah kông angâ, kơnâng mơdât ƀă hía hé kô kơdroh châ 125 ha ƀăng kong tro tơdjâk.

Ƀă tơdroăng tơkêa bro troăng kân ăm phêp rơxế kơtâu têi kố, pôa Trần Hồng Hà, Ngế pro xiâm phŏ hnê ngăn Chin phuh pơkâ thế 2 kong pơlê Khánh Hòa ƀă Lâm Đồng, Khu mơ’no liăn cheăng Grup pơkuâ Sơn Hải ƀă mâu khu xiâm kơvâ cheăng ki tơdjâk kal rơtế pêi, tơkŭm hriăn plĕng, mơjiâng kêi đeăng mâu troăng kih thuât, ‘na luât, ki má lối thế tơmiât inhên troăng pêi pro ‘na liăn ngân.