Pôa Trần Hồng Hà, Ngế pro xiâm phŏ hnê ngăn tơnêi têa pơkâ thế Pơlê kong kân Hải Phòng rak vế tơdroăng ki gâk ngăn khía mơhot kân, tối tơbleăng đi đo dêi troăng prôk dêi khía, pôi tá tơngôu. Ngế pro xiâm phŏ hnê ngăn tơnêi têa tối nhên, maluâ Pơlê kong kân Hải Phòng hiăng ai tơdroăng ki vâ hbrâ ví ƀă khía mơhot kân; laga, xuân athế hbrâ rơnáu mâu tơdroăng ki pêi pro tơdrêng môi tiah pâ on tơhrik, têa tâk đik, hbrâ rơnáu túa ki tơpui tơbleăng, tơrŭm pơla mâu tíu pêi cheăng vâ séa ngăn tơdroăng tâng ai.

Tiô khu pơkuâ ngăn rơchoâ, long, ‘noăng têa, Khu xiâm ngăn chiâk deăng ƀă mơnhông thôn pơlê, hbrâ ví ƀă khía mơhot kân rôh má 3, riân troh kơxê lơ 6/9, mâu kong pơlê, pơlê kong kân mê cho: Quảng Ninh, Hải Phòng, Thái Bình, Nam Định, Ninh Bình hiăng ‘mâi xĕn 37 rơpâu 188 ngế a tíu ki păn ká tung tơdrong, a hơpăm păn ká xi xŏng, tung mâu hngêi ki hiăng tơ’nhiê kơpong kĭng têa kơxĭ, kơpong thông, mơni kô troh a tíu tơniăn.

Khu mố đô̆i gâk tơkăng kong drô troăng têa kơxĭ hiăng lăm ngăn, hnê mơhno ăm lối 51 rơpâu to toăng tuk ƀă lối 220 ngế ‘nâi tơdroăng khía mơhot kân rôh má 3 vâ hbrâ rơnáu ví xía vâ, troh nôkố, tung tâi tâng plong tuk hiăng mot ối a tíu ối. Mâu kong pơlê, pơlê kong kân ing Quảng Ninh troh Nghệ An ƀă Quảng Bình hiăng pêi pro tơdroăng pơkâ mơdât prôk lăm lo ing hngêi ing hâi lơ 6/9.