A rôh tơdah, pôa Trần Hồng Hà, Ngế pro xiâm phŏ hnê ngăn tơnêi têa ăm ‘nâi ƀă tơdroăng ki veăng tung tơdroăng tơkêa kong têa tơrŭm cheăng hơ’lêh on tơhrik tơdâng tơ’mô (JETP), Việt Nam rơhêng vâ châ xo tơdroăng tiâ mơnhên, tŏng kum ‘na kih thuât dêi mâu kong têa tơrŭm cheăng tung lâp plâi tơnêi tung pơla tơbleăng tơdroăng tơkêa (JETP) ‘na: Túa pơkâ mơjiâng mâu tíu xiâm on tơhrik ki ‘mâi bro on tơhrik khía a têa kơxĭ, troăng ki mơ’no ki rơkê ƀă kơxô̆ liăn ‘no tơtro ƀă tơdroăng ki pêi lo liăn dêi kuăn pơlê Việt Nam; troăng hơlâ liăn ngân ngiât, mơdêk rĕng hơ’lêh on tơhrik, hơ’lêh ngiât môi tiah tơhrâ.

Tiô pôa Trần Hồng Hà tơdroăng ki kal má môi nôkố cho kal ai mâu hvêa chêng prôk, troăng pơkâ pêi pro hơ’lêh túa tơmiât, tơhrâ tung JETP ‘na tŏng kum kơmăi kơmok, liăn ngân, rak ngăn ƀă hên ki ê ăm mâu tơdroăng tơkêa hơ’lêh on tơhrik, ôh tá pơrah tơnêi têa mơnhông ƀă dế mơnhông tơtêk.