Kơxêi hâi lơ 3/3, tung roh Hôp Khu xiâm ngăn ‘na pơlê pơla ôh tá ok xok châu Á a Tokyo, kong têa Nhuk, pôa Trần Hồng Hà, Ngế pro xiâm phŏ hnê ngăn Chin phuh hiăng trâm mâ, tơpui ƀă pôa Hosoda Hiroyuki, Kăn xiâm hnê ngăn Kuô̆k hô̆i râ má peá, trâm pôa Nikai Toshihiro, Kăn xiâm hnê ngăn tơrŭm Kuô̆k hô̆i Việt Nam-Nhuk, tơdah pôa Nishimura Yasutoshi, Ngế xiâm ngăn ‘na cheăng kâ ƀă mâu kăn Kuô̆k hô̆i dêi Đảng Dân chủ Tự do ‘na kơvâ ngăn ‘na tơnêi tíu, hyôh kong prâi.

A chôu phut trâm mâ mê, pôa Trần Hồng Hà mơnhên tối tơdroăng ki mơnhông lĕm tro tơrêm kơvâ cheăng ki tơrŭm trâu rơdâ, hơngế pơla Việt Nam ƀă Nhuk; pâ thế pôa Hosoda Hiroyuki veăng kum po hên hneăng trâm mâ pơla mâu kăn cheăng tung Chin phuh, Kuô̆k hô̆i, mâu kăn Kuô̆k hô̆i hơnăm ối nếo dêi 2 pâ kong têa; mơnhông Chin phuh Nhuk tŏng kum ăm peăng Việt Nam tung mơnhông pêi cheăng kâ, rêh ối, hnê mơjiâng mơngế rơkê, hơ’lêh xúa on tơhrik ki nếo, klêi mê thăm mơdêk tơrŭm cheăng tung mâu kơvâ hriăn plĕng ‘na khoa hok, hnê mơhno ‘na cheăng kơmăi kơmok ƀă tŏng kum ăm tơdroăng ki mơnhông krá tơniăn.