Kơxo lơ 8/2, a Tíu pêi cheăng Chin phuh, pôa Trần Lưu Quang, Ngế pro xiâm hnê ngăn tơnêi têa, Kăn hnê ngăn Vi ƀan hnê mơhno tơrŭm cheăng pơla Việt Nam – Sinuâ hiăng ai roh tơdah pôa Hùng Ba, Kăn teăng mâ pôu râng hnoăng kong têa Sinuâ a Việt Nam. Tung tơrŭm cheăng nhŏng o ƀă phiu ro, pôa Trần Lưu Quang pói vâ péa pâ pơtối thăm pêi pro rơdêi tơrŭm cheăng tung la ngiâ.

Pôa Trần Lưu Quang pói vâ péa pâ pơtối thăm trâm mâ, tơpui tơno, hiăng rơtế pôa Hùng Ba hvái ngăn mâu tơdroăng châ tơƀrê tơrŭm cheăng ton xŏn tŭm têk Việt Nam – Sinuâ hơnăm 2022 ƀă prôk trâu hơngế tơpui tơno ‘na mâu troăng thăm tơrŭm cheăng pơla péa pâ tung la ngiâ. Pôa Trần Lưu Quang pói vâ péa pâ pơtối thăm trâm mâ tơpui tơno, trâm mâ khu râ kăn xiâm, tơkŭm po lĕm Roh hôp roh má 15 Vi ƀan hnê mơhno tơrŭm cheăng pơla Việt Nam – Sinuâ, mâu tơdroăng trâm mâ, tơpui tơno pơla péa Đảng ƀă pơla mâu khu cheăng, khu xiâm, kơvâ cheăng, khu râ, kong pơlê péa tơnêi têa. Pơkâ thế péa pâ thăm tơtêk tê mơdró pơla péa pâ tiô troăng tơdâng, krá tơniăn ƀă hía hé.