Kơxê lơ 14/3, a tíu pêi cheăng Chin phuh, pôa Trần Lưu Quang, Ngế pro xiâm phŏ hnê ngăn Chin phuh hiăng tơdah kăn teăng mâ Australia a Việt Nam - pôa Andrew Goledzinowski. A rôh tơdah, pôa Trần Lưu Quang tối phiu ro Tơrŭm cheăng tung la ngiâ pơla Việt Nam - Australia rế hía rế mơnhông rơdêi, trâu rơdâ, ai pơxúa hên tung mâu kơvâ cheăng, malối, tê mơdró pơla péa pâ hlo tâk rơdêi, châ 16,1 rơtal dollars tung hơnăm 2022, tâk lối 30 hdroh tâng pơchông ƀă hơnăm 2021, ăm Australia chiâng kong têa tơrŭm cheăng tê mơdró kân má 10 dêi Việt Nam ƀă Việt Nam cho kong têa tê mơdró kân má 7 dêi Australia.

Ngế pro xiâm phŏ hnê ngăn tơnêi têa pơkâ thế péa pâ tơrŭm krá tơniăn vâ tơkŭm pro tơniăn tro mâu tơdroăng cheăng tơbâ 50 hơnăm mơjiâng tơrŭm cheăng tơpui kâ pơla Việt nam – Australia a hơnăm 2023, tung mê, ai tá tơdroăng ki hbrâ rơnáu krâu ăm mâu tơdroăng cheăng pơtroh mâu khu râ kăn pơla péa tơnêi têa tung la ngiâ.

Tung tơrŭm cheăng pơla péa pâ mơdêk ki tơniăn lĕm, péa ngế kăn xiâm pơkuâ tối nhên ki kal dêi tơdroăng rak vế hơniâp lĕm, tơniăn, tơrŭm tung kơpong ƀă tung lâp plâi tơnêi; ngăn nhuô̆m tơdroăng pơkâ Khu lâp kong têa ƀă luât lâp plâi tơnêi.