A roh pêi cheăng, pôa Trần Lưu Quang, Ngế pro xiâm phŏ hnê ngăn tơnêi têa kheăn kơdeăn păng ‘nâng Vi ƀan hdroâng kuăn ngo hiăng tơbleăng ăm Chin phuh, Ngế pro xiâm hnê ngăn Chin phuh séa ngăn, ‘mâi tơ’nôm pêi kêi đeăng troăng hơlâ luât tơdjâk troh tơdroăng tŏng kum hdroâng kuăn ngo.

Troh nôkố, ing troăng hơlâ luât tơdjâk troh tơdroăng tŏng kum hdroâng kuăn ngo. Ing troăng pơkâ pêi, troăng hơlâ dêi Đảng, Tơnêi têa hiăng pêi pro chiâng troăng hơlâ, luât tơdjâk troh tơdroăng tŏng kum hdroâng kuăn ngo tung tâi tâng mâu kơvâ tơdroăng rêh ối dêi vâi krâ hdroâng kuăn ngo.

Laga, tơdroăng pêi pro mâu tơdroăng pơkâ xiâm tơnêi têa ối hrá, chiâng ai tơdroăng mơ’no liăn cheăng tơdroăng pêi pro pơkâ xiâm tơnêi têa ối hrá nếo châ lối 43%. ‘Na mâu tơdroăng pâ thế dêi Vi ƀan hdroâng kuăn ngo tơdjâk troh tơvâ tơvân ‘na kơlo, mơngế mơ’no liăn cheăng ối tung hnoăng dêi Vi ƀan hdroâng kuăn ngo pơkuâ, Ngế pro xiâm phŏ hnê ngăn tơnêi têa pơkâ thế Vi ƀan rĕng tơbleăng Ngế pro xiâm hnê ngăn Chin phuh séa ngăn kĭ ăm pêi pro hdrối lơ 15/2.