VOV4.Xơ Đăng - Hâi lơ 10/2, a pơlê kong kơdrâm Plei Ku, kong pơlê Gia Lai, pôa Trần Lưu Quang, Ngế pro xiâm phŏ hnê ngăn pơkuâ hneăng hôp mơ’no tơdrêng tung um tơvi  tơbleăng 3 Tơdroăng pơkâ pêi dêi tơnêi têa pơla hơnăm 2021-2025 ‘na mơjiâng thôn pơlê nếo, xăm kơtiê krá ton ƀă mơnhông cheăng kâ - rêh ối a Tây Nguyên.

Tiô tơdroăng ăm ‘nâi a hneăng hôp tơpui pêi cheăng, pơla hơnăm 2021-2025, mâu kong pơlê kơpong Tây Nguyên châ tíu xiâm tơnêi têa pơcháu lối 11 rơpâu 700 rơtal liăn vâ pêi 3 tơdroăng pơkâ dêi tơnêi têa. Mâu kơxô̆ liăn mế châ lối 11,73% tung tâi tâng liăn ngân ‘no mơnhông mơdêk, dêi tíu xiâm ăm 3 tơdroăng pơkâ dêi tơnêi têa têa tung lâp tơnêi têa.

Krê hơnăm 2022, tíu xiâm ăm lối 3 rơpâu 878 rơtal liăn ƀă mâu kong pơlê Tây Nguyên hiăng xoăng lối 870 rơtal liăn ăm mâu kong pơlê vâ pêi mâu tơdroăng cheăng. Troh lơ 31/12/2022, mâu kong pơlê tung kơpong nếo xo liăn ngân 34% tung tâi tâng kơxô̆ liăn dêi tíu xiâm pơcháu, (iâ tâ kơxô̆ liăn ngân xo ki riân tung lâp tơnêi têa).

Khế 1/2023, hiăng ai 3 tung 5 to kong pơlê cho Kon Tum, Lâm Đồng, Dak Nông pê klêi tơdroăng xing xoăng liăn vâ ‘no pêi tung hơnăm. Ing tơdroăng hlo ai khât mê, mâu tơdroăng ối tơvâ tơvân a Tây Nguyên kăn hnê ngăn mâu kong pơlê hiăng tối mâu tơdroăng pêi pro vâ Chin phuh séa ngăn, pôa Trần Lưu Quang pơkâ thế mâu kong pơlê rĕng pê klêi tơdroăng pơcháu liăn; xúa liăn pêi cheăng tro tơrêm tơdroăng cheăng; pơkâ thế mâu kơ koan, khu xiâm kơvâ cheăng dêi tơnêi têa pêi tơdrêng tơdroăng séa ngăn, pê klêi mâu pơkâ ki hâi teăng tŭm.

‘Na peăng kong pơlê, Ngế pro xiâm phŏ hnê ngăn tơnêi têa thế mơdêk pêi mâu tơdroăng cheăng dế pêi; mơdêk tơrŭm pơla mâu kong pơlê ƀă kơvâ cheăng xiâm tơnêi têa ƀă tơrŭm tung mâu kơ koan, tíu pêi cheăng dêi tơrêm kong pơlê tung tơdroăng tơbleăng pêi.