Kơxê lơ 16/2, pôa Trần Lưu Quang, Ngế pro xiâm phŏ hnê ngăn tơnêi têa pêi cheăng ƀă Khu xiâm pơkuâ kăn ƀô̆ ‘na tơdroăng châ tơƀrê pêi pro hnoăng cheăng sap ing klêi kơ’nâi Hneăng hôp 13 dêi Đảng ƀă hnoăng cheăng xiâm hơnăm 2023. Tiô tơbleăng dêi Khu xiâm pơkuâ kăn ƀô̆, pêi pro Pơkâ kơxô̆ 18, 19 dêi Tơnêi têa ‘na pơ’lêh nếo rah xo tơtro khu râ kăn xiâm pêi cheăng kal kí, sap hơnăm 2021 troh nôkố, hiăng kơdroh 17 kơ koan xiâm ƀă khu tơrŭm cheăng ki tơdâng; kơdroh 8 kơ koan râ xiâm ối tung kơ koan xiâm ƀă ối tung Khu xiâm; kơdroh 7 khu cheăng ƀă lối 2.100 ƀơrô ối tung Vi ƀan râ kong pơlê, râ tơring, kơdroh vâ chê 7.500 tíu pêi cheăng tơnêi têa, châ 13,5% tâng pơchông ƀă hơnăm 2016.

Troh tâi hơnăm 2021, pêi kêi đeăng pơkâ kơdroh ƀiên chê̆ (ƀă khu kŏng chưk cho 10% ƀă khu tíu cheăng tơnêi têa cho 11,6% viên chưk châ kâ liăn khế ing liăn ngân tơnêi têa). Mơgêi roh pêi cheăng, pôa Trần Lưu Quang mơnhên, kheăn kơdeăn mâu tơdroăng châ tơƀrê ki Khu xiâm pơkuâ kăn ƀô̆ hiăng châ sap ing klêi kơ’nâi hneăng hôp 13 dêi Đảng troh nôkố.

‘Na mâu tơdroăng pâ thế dêi Khu xiâm pơkuâ kăn ƀô̆, tung mê ai tơdroăng Chin phuh rĕng ai tơpui ‘na tơdroăng tơkêa bro pơ’lêh nếo rah tơtro mâu ngế pêi cheăng tung kơ koan tơnêi têa ƀă pơ’lêh tíu pêi cheăng mâu viên chưk chiâng kŏng chưk.