Klêi kơ’nâi séa ngăn, Ngế pro xiâm phŏ hnê ngăn tơnêi têa pơkâ thế khu râ kăn pơkuâ kong pơlê Điện Biên, mâu khu cheăng ki tơdjâk ƀă khu lêng dêi kong pơlê pêi pro rĕng tâ nếo tơdroăng rơnêu kế tơmeăm khoăng xua kong prâi pro, rĕng ti tăng tơnêi  vâ pro tíu xĕn ối ăm kuăn pơlê, rak tơniăn tơdroăng rêh ối ăm kuăn pơlê kơpong ai têa rơlêa, tơnêi tơhnah tơhnâp; mơdêk pơtâng tối ƀă khŏm xĕn ƀă mâu rơpŏng a tung kơpong tơ’lêi tơhnah tơhnâp vâ tơniăn châ chăn, tơmeăm khoăng ăm kuăn pơlê.

Klêi kơ’nâi kong mêi têa kân lân lu, kal thăm pêi pro troăng khăm pơlât, vâ tơniăn rak ngăn ivá ăm kuăn pơlê, ki má lối ƀă mơngế krâ ƀă vâi hdrêng. Ngế pro xiâm phŏ hnê ngăn tơnêi têa xuân pơkâ thế Vi ƀan tơring Điện Biên tŏng kum, rơnêu, tŏng gum mâu ƀăng deăng pêt tơmeăm tơmeăm dêi kuăn pơlê tro lŭp; pơhlêh hdrê loăng plâi vâ kuăn pơlê ai tơmeăm vâ mơnhông cheăng kâ.