Kơxê lơ/3, a tiú pêi cheăng Chin phuh, pôa Trần Lưu Quang, Ngế pro xiâm phŏ hnê ngăn tơnêi têa ai rôh tơdah ngế xiâm phŏ ngăn tê mơdró kong têa Mih - jâ Marisa Lago dế ai rôh pôu pêi cheăng a Việt Nam. Koh tơdah kơ jâ Marisa Lago troh pôu Việt Nam, pôa Trần Lưu Quang tối nhên, Việt Nam rơhêng vâ mơdêk tơrŭm cheăng pơla péa tơnêi têa rế hía rế ai pơxúa tâ, tâi tâng tâ. Ngế pro xiâm phŏ hnê ngăn tơnêi têa pơkâ thế ngế xiâm phŏ ngăn tê mơdró Mih jâ Marisa Lago kum tơdjêp mâu khu ki ‘no liăn cheăng Mih, malối cho tung mâu kơvâ cheăng kơmăi kơmok rơxông nếo, mơjiâng pro kơmăi kơmok,  tơƀai, veăng mơ’no liăn cheăng a Việt Nam; pơkâ thế péa tơnêi têa kô vêh séa ngăn tơrŭm cheăng tung mâu tơdroăng cheăng ki tối ăm dêi rơpó ki rơkê plĕng, tơdroăng kal, tơdroăng ki ai tơdjâk troh mơdêk hơ’lêh kơxô̆, mơdêk ivá ƀă tơdroăng ki xúa kơxô̆ ăm mâu ngế pêi cheăng tung mâu kơvâ cheăng tơdjuôm ƀă krê.

Ngế pro xiâm phŏ hnê ngăn tơnêi têa tối nhên, Việt Nam kô hbrâ rơnáu tơrŭm ƀă Mih vâ tŏng kum mâu tơdroăng tơmiât dêi tá péa pâ, rak vế tơrŭm cheăng tê mơdró tơniăn, tơmiât troh tơdroăng ki tê mơdró hơniâp lĕm, krá ton ki péa pâ rơtế ai pơxúa.