Kơxo lơ 27/2, a Geneva, Swiss, pôa Trần Lưu Quang, Ngế pro xiâm phŏ hnê ngăn Chin phuh hiăng pơkuâ djâ khu kăn Việt Nam veăng ai mâ a rôh pơxiâm po tơdroăng ƀă tơpui a Rôh hôp khu râ kăn xiâm Hneăng hôp tiah hmâ rôh má 52 dêi Hô̆i đong Hnoăng pơkuâ Khu lâp kong têa. Tơpui a Rôh po hôp khu râ kăn xiâm, pôa Trần Lưu Quang, Ngế pro xiâm phŏ hnê ngăn Chin phuh tối nhên  Rơkong tơpui Hnoăng pơkuâ lâp plâi tơnêi ƀă Rơkong tối tơbleăng ƀă Tơdroăng pêi pro Vienna ‘na hnoăng kuăn mơngế cho mâu tơdroăng ki krá rơdêi vâ mâu kong têa tung lâp plâi tơnêi rơtế mơdêk ki hlê plĕng ƀă pêi pro vâ mơdêk ƀă rak vế mâu hnoăng kuăn mơngế ƀă hiăng pêi pro châ mâu tơdroăng ki kal ing hên chât hơnăm.

Pôa Trần Lưu Quang, Ngế pro xiâm phŏ hnê ngăn Chin phuh tối nhên túa pơkâ dêi Việt Nam veăng tung Hô̆i đong Hnoăng pơkuâ cho: “Loi nhuô̆m ƀă hlê plĕng”. Tơpui tơno ƀă tơrŭm cheăng. Tâi tâng mâu hnoăng kuăn mơngế cho tâi tâng rêm ngế”. Ngế pro xiâm phŏ hnê ngăn tơnêi têa tối nhên kal kơjo kum ki apoăng cho tơkŭm pêi pro tơdroăng hôp ki kal 2023 xua tơdroăng ki mơnhông krá tơniăn dêi Khu lâp kong têa ƀă mâu tơdroăng tơhrâ ‘na hmâ ƀă kong prâi pro hơ’lêh.