Tung 47 hơnăm hdrối, pơtối ƀă rak vế pêi pro tơdroăng ki lĕm ton nah dêi Mố đô̆i Trường Sơn, Ƀinh đoân 12, ai tíu pêi cheăng a Kơpong tơdế tơnêi têa nếo pêi klêi tơdroăng hrik tăng ƀom, mìn, tơmeăm chiâng pơtôu, nếo po rơdâ kơvâ cheăng tê mơdró. Tíu pêi cheăng hiăng veăng mơjiâng pro ƀă pê klêi mâu tơmeăm khoăng cho troăng prôk, kâng rơchôa a mâu tíu tung lâp tơnêi têa tơniăn pro tiô pơkâ, mơjiâng pro krá, tơniăn, pêi tơƀrê.

A rôh pêi cheăng, pôa Trần Quang Phương, Kăn xiâm phŏ hnê ngăn Kuô̆k hô̆i pơkâ thế mâu kăn ƀô̆, mâu lêng Ƀinh đoân 12 tơmâng pêi tro hnoăng cheăng kal kí ki Khu xiâm Đảng lêng pơcháu, hlối pêi chiâk deăng, hlối hriâm tơplâ. Nôkố, Đảng, Tơnêi têa, kuăn pơlê hiăng loi khât pơcháu ăm Ƀinh đoân 12 pêi pro mâu tơmeăm khoăng ki kal dêi tơnêi têa.

Kăn xiâm phŏ hnê ngăn Kuô̆k hô̆i pơkâ thế Ƀinh đoân 12 thế pê klêi ƀă bú chiâng phêp pêi klêi mâu tơdroăng cheăng pôi tá ăm ai mâu tơdroăng ki ôh tá tro klâi. Tung pơla pêi pro, thế tơmâng pêi tơƀrê tơmeăm khoăng, thế tơmiât troh ki pơxúa krá tơniăn.