Kơxo hâi lơ 7/8, a Hngêi Kuô̆k hô̆i, pôa Trần Thanh Mẫn - Kăn xiâm hnê ngăn Kuô̆k hô̆i pơkuâ pêi cheăng ƀă Khu kăn mâu Vi ƀan cheăng kâ; Vi ƀan ‘na Liăn ngân tơnêi têa; Vi ƀan Khoa hok, Kŏng ngê̆ ƀă  ngăn ‘na hyôh kong prâi dêi Kuô̆k hô̆i ‘na tơdroăng cheăng pêi dêi mâu kơ koan sap apoăng hneăng má 15 troh nôkố ƀă troăng hơlâ, tơdroăng cheăng pêi ki kal sap nôkố ta troh mơ’nui hneăng.

Tơbleăng hnê mơhno a rôh pêi cheăng, Kăn xiâm hnê ngăn Kuô̆k hô̆i tối nhên, kố cho rôh vâ Kăn xiâm hnê ngăn Kuô̆k hô̆i, mâu Kăn xiâm phŏ hnê ngăn Kuô̆k hô̆i tơmâng, tối ‘na ki tơƀrê, ki rơkê tung pêi cheăng ing mâu pơkâ hiăng tơbleăng pêi ƀă mâu tơdroăng pơkâ pêi tơdrêng, mâu tơdroăng nếo ‘nâi, nếo ai, séa ngăn mâu tơdroăng ki lâi hiăng chiâng pêi, tơdroăng ki lâi hâi chiâng pêi; mâu tơdroăng ki pá tơvâ tơvân kal tah mâu troăng rơhlâ dêi mâu Vi ƀan sap nokố ta troh mơ’nui hneăng.

Ing mê, Kăn xiâm hnê ngăn Kuô̆k hô̆i pơkâ thế rêm râ dêi Vi ƀan tơkŭm, a mâu tơdroăng hiăng chiâng pêi pro ƀă tơdroăng ki pêi tơƀrê dêi tơrêm tíu pêi heăng, mâu tơdroăng hâi chiâng pêi ƀă mâu tơdroăng pâ thế.