Pơtối Rôh hôp má 36, kơxo lơ 21/8, a Hngêi hôp Kuô̆k hô̆i, xua tơdroăng pơkuâ po dêi pôa Trần Thanh Mẫn, Kăn xiâm hnê ngăn Kuô̆k hô̆i, Vi ƀan pơkuâ Kuô̆k hô̆i tơkŭm po kơ-êng ƀă tiâ rơkong kơ-êng tơdroăng pêi pro mâu pơkâ dêi Vi ƀan pơkuâ Kuô̆k hô̆i ‘na séa ngăn tơdroăng ‘na kơ-êng ing apoăng hneăng cheăng Kuô̆k hô̆i hneăng 15 troh tâi hơnăm 2023.

Tơpui a rôh kơ-êng, pôa Trần Thanh Mẫn, Kăn xiâm hnê ngăn Kuô̆k hô̆i ăm ‘nâi: Kố cho rôh apoăng tung hneăng cheăng Kuô̆k hô̆i hneăng 15, Vi ƀan pơkuâ Kuô̆k hô̆i tơbleăng pêi pro “vêh séa ngăn”, mơhno hnoăng cheăng dêi Vi ƀan pơkuâ Kuô̆k hô̆i tung séa ngăn troh tui lui tơdroăng pêi pro pơkâ thế, pâ thế dêi Kuô̆k hô̆i, Vi ƀan pơkuâ Kuô̆k hô̆i.

Ing mê, mơnhên tối tâi tâng, pêi pro nhên mâu tơdroăng pá puât, tơvâ tơvân tung pơla pêi pro, tŏng kum, mơdêk tâ nếo hnoăng cheăng dêi mâu kơ koan pôu râng tơdroăng séa ngăn. Kăn xiâm hnê ngăn Kuô̆k hô̆i loi tung mâu khu kăn Kuô̆k hô̆i ƀă tuăn ngoâ rơkê, hiâm mơno chêh bro, pleăng hnoăng ăm Chin phuh, mâu khu xiâm kơvâ cheăng tung hnê mơhno, pơkuâ, ‘mâi mơnhông mâu tơdroăng ki tá hâi pêi pro klêi, tŏng gum mâu tơdroăng pá puât, tơvâ tơvân.

Mâu ngế cheăng tung Chin phuh, mâu ngế xiâm pơkuâ kơvâ cheăng pơtối mơhno hiâm mơno pôu râng, mơ-eăm khât, tiâ mơnhên tơdrăng, tro tơdroăng ki xiâm, mơ’no tối hnoăng cheăng, troăng hơlâ pêi pro ƀlêi chiâng mâu tơdroăng pơkâ, hnoăng cheăng dêi Kuô̆k hô̆i, Chin phuh pơkâ mơ’no dêi hơnăm 2024 ƀă Pơkâ Hneăng hôp rôh má 13 dêi Đảng.