Kơxê lơ 25/8, a Hngêi Kuô̆k hô̆i, pôa Trần Thanh Mẫn, Kăn xiâm hnê ngăn Kuô̆k hô̆i hiăng pơkuâ leh tơdah. Klêi kơ’nâi leh tơdah, péa pâ hiăng tơkŭm tơpui tơno. A hôp tơpui tơno, péa pâ rơtế môi tuăn pơtối pêi pro châ tơƀrê Troăng pêi cheăng ton xŏn Thăm tơrŭm Cheăng kâ Việt Nam – Australia, tơmiât troh la ngiâ pơkâ xiâm djâ pêi lo liăn tê mơdró châ kơlo 20 rơtal dollars ƀă tâk châ péa xôh mơ’no liăn cheăng péa troăng tung la ngiâ; mơdêk mâu tơdroăng mơhnhôk tê mơdró, tơdjêp tê mơdró pơla mâu khu tê mơdró tê ngi kong têa ê tơmeăm dêi péa tơnêi têa.

Tung la ngiâ, pôa Trần Thanh Mẫn, Kăn xiâm hnê ngăn Kuô̆k hô̆i pơkâ thế péa pâ, thăm trâm mâ khu râ kăn xiâm ƀă mâu Vi ƀan dêi Kuô̆k hô̆i, pơla mâ kăn xiâm Kuô̆k hô̆i râ má péa, pơla péa Khu kăn xiâm Kuô̆k hô̆i râ má péa nhŏng o vâ tơpui tơno tơdroăng kal, tối ăm dêi pó túa ki rơkê tơtro tung tơkŭm po tơdroăng Kuô̆k hô̆i râ má môi, ki má lối cho tung tơdroăng mơjiâng pơkâ pêi, pêi kêi đeăng luât ƀă séa ngăn po rơdâ tơdroăng pêi pro luât.