Khu kăn Kuô̆k hô̆i Việt Nam xua pôa Trần Thanh Mẫn, Kăn phŏ hnê ngăn Kuô̆k hô̆i pơkuâ djâ, hiăng troh a pơlê kong xiâm Madrid,  pơxiâm pôu pêi cheăng a Tây Ban Nha sap hâi lơ 15/3 troh lơ 18/3. Tung rôh tơdah Kăn xiâm pơkuâ ngăn Đảng Kŏng sản Tây Ban Nha, pôa Trần Thanh Mẫn khĕn kơdeăn mâu tơdroăng ki tơƀrê tung tơrŭm cheăng pơla péa pâ Việt Nam - Tây Ban Nha, mơhno ing mâu rôh trâm mâ pơla mâu kăn xiâm péa tơnêi têa tung mâu hơnăm hdrối mê hía nah.

Kăn xiâm phŏ hnê ngăn Kuô̆k hô̆i tối Việt Nam đi đo tơmâng xo, khĕn kơdeăn tơdroăng cheăng Đảng Kŏng sản Tây Ban Nha cho môi tung mâu Đảng Kŏng sản ki apoăng a Tây Âu mơjiâng tơrŭm cheăng ƀă Đảng Kŏng sản Việt Nam, hiăng đi đo môi tuăn ƀă veăng kum Việt Nam tung rôh tơplâ  vâ pro tơleăng lĕm tơniăn ăm hdroâng mơngế.

Pôa Trần Thanh Mẫn, Kăn phŏ hnê ngăn Kuô̆k hô̆i púi vâ tơrŭm pơla péa Đảng pơtối trâu rơdâ, veăng kum tơrŭm tơƀrê pơla péa tơnêi têa.